Ál-Farabı atyndaǵy Qazaq Ulttyq ýnıversıteti Shyǵystaný fakýltetiniń ǵımaratynda Qytaı Halyq Respýblıkasynyń Chýnsın qalasynyń halyqtyq basshylyǵynyń uıymdastyrýymen «Chýnsın kelbeti» biregeı fotokórmesiniń ashylý rásimi ótti.
Qazaqstan Respýblıkasynyń Ulttyq kitaphanasy, Almaty qalasyndaǵy Qytaı Bas elshiligi, ál-Farabı atyndaǵy QazUÝ shyǵystaný fakýlteti, Konýsıı ınstıtýty uıymdastyrǵan atalmysh kórmede Almaty qalasyndaǵy QR Syrtqy ister mınıstrliginiń Almatydaǵy ókildiginiń jetekshisi Rýslan Bóltirikov, Almatydaǵy Qytaı Bas konsýly Chjan Veı sóz sóılep, Qazaqstan men Qytaı arasyndaǵy mádenı yntymaqtastyqtyń asa mańyzdy ekenin atap ótisti. «Qazaqstan–Qytaı yntymaqtastyǵynyń zamanaýı kezeńi 1992 jyldyń qańtarynan, táýelsiz Qazaqstan Qytaı Halyq Respýblıkasymen resmı dıplomatııalyq mıssııalyq qarym-qatynastar ornatqan kezden bastalǵan. Ekijaqty tatý kórshilik qatynastardy ornatý men olardy damytý – Qazaqstannyń syrtqy saıasattyq halyqaralyq qyzmetiniń eń mańyzdy bóligi», dep atap ótti Rýslan Eskendiruly.
QR Ulttyq kitaphanasy dırektorynyń orynbasary Ajar Iýsýpova óz kezeginde: «Fotokórmeniń maqsaty – Qazaqstan halqyna Qytaı mádenıeti men tilin tanystyrý, eki eldiń bilimi men mádenıeti, aqparat salasyndaǵy yntymaqtastyqty nyǵaıtý, damytý. Ár úsh jylda bir ret Qytaı Bas konsýldyǵynyń muryndyq bolýymen Qytaıdyń eń iri qalalarynyń kórmesi ótkizilip turady. Máselen, 2013 jyly Shanhaı qalasynyń kelbetine qatysty kórme uıymdastyryldy. Ár qalanyń fotokórmeleri qazaqstandyqtardyń Qytaımen tanysý nıetinen týyndap otyrǵan bastama. Al Pekın qalasynda QR Ulttyq kitaphanasynyń ádebı ortalyǵy ashylǵan, onda da qazaq ádebıeti men mádenıetine qatysty kórmeler jıi ótkizilip turady» – deı kele,munyń bári eki el arasyndaǵy yntymaqtastyqty kúsheıtý úshin atqarylyp jatqan sharýalar ekenin jetkizdi.
Sondaı-aq, Almaty qalasy ákimshiliginiń Mádenıet basqarmasy, QR kitaphanasy, Almaty qalasyndaǵy QHR Bas elshiligi, Chýnsın halyqtyq ókimetiniń Nasıhattaý bólimi, «Chýnsın» gazeti birlestigi, «Búgingi Chýnsın» jýrnaly birlestigi, Almaty qalasynyń ǵylymı mekemeler ókilderi men belgili blogerler, baspalar basshylary qatysqan «Chýnsın kelbeti» fotokórmesi aıasynda aqyldy rezetki, qadaǵalaý kamerasy, aqyldy sham men turmystyq tehnıkany basqarýynyń ınfraqyzyl toptamasynan turatyn úıdi avtomattandyrý júıesi kórsetiletin «Xiaomi» qytaı ıntellektýaldyq kompanııasynyń «Aqyldy úı» kórsetilimi boldy. «Aqyldy úı» júıesi Qytaıda ǵana emes, búkil álemdegi sońǵy jyldar trendiniń biri sanalatyny aıta ketken jón.
«Atap óterligi, Chýnsın – Qytaı elindegi halqynyń sany 32 mln adamnan asatyn, úsh myń jyldyq tarıhy bar, mádenı-tarıhı eskertkishter men belgili tarıhı kórikti jerlerge: murajaılarǵa, ǵıbadathana keshenderine, jartastardaǵy salynǵan bederlerge, úńgirlerge, sáýlettik jaýharlarǵa baı qala, – dep atap ótken Chýnsın deılı» baspalyq toptyń prezıdenti Sıan Szeın myrza: – «Bir beldeý – bir jol» jobasyna baılanysty biz óz jolymyzdy Qazaqstannan bastadyq. 2013 jyly Chýnsın qalasynda Qazaqstan eliniń kórmesi ótken edi. Al búgingi kórmeniń basty maqsaty – eki el arasyndaǵy dostyqty, yntymaqtastyqty, ekonomıkany, saýda-sattyqty, bilim berý salasyndaǵy qarym-qatynasty arttyrý bolyp tabylady. Men Almatyǵa bir emes, birneshe márte keldim. Maǵan Almatynyń taýy qatty unaıdy. Qytaımen salystyrǵanda aýasy da áldeqaıda taza eken. Búgingi kórme eki el arasyndaǵy mańyzdy yntymaqtastyqtyń jalǵasy dep bilemin», – dedi.
Chýnsın qalasynyń erekshelikterin aıshyqtaıtyn 40-tan astam fotosýret qoıylǵan kórmede sonymen qatar, QR Ulttyq kitaphanasy qorynan Aspan asty eliniń sırek qoljazbalary men kitaptary usynylǵan «Kitap halyqtardy biriktiredi» atty kóshpendi kitap kórmesi de uıymdastyryldy. QR Ulttyq kitaphanasynda 2016 jyly ashylǵan Qytaı mádenıeti jáne ádebıeti ortalyǵyndaǵy qytaı tilindegi 12 myńǵa jýyq kitaptyń Qytaıdyń mádenıeti, kóne mádenıeti, damý tarıhyna qatysty birqatar tańdamaly kitaptary osy kórme tórinen oryn alypty. Kórmeden ózge, Konfýsıı ınstıtýtynyń ókilderimen daıyndalǵan dástúrlik qytaılyq sháı rásimi berilip, kóne mýzykalyq aspaptar oınaldy.
Mıra Baıbek,
«Egemen Qazaqstan»
ALMATY