Búgin Jambyl oblysynyń Aısha bıbi aýylynda gaz ınfraqurylymynyń jańa nysany paıdalanýǵa berildi, ol «Qazaqstan - Qytaı» gaz magıstralynyń ónimdiligin arttyrýǵa septigin tıgizedi, dep habarlaıdy oblys ákimdiginiń baspasóz qyzmeti.
№3 kompressor stansasyn «QazMunaıGaz» AQ ulttyq kompanııasy iske qosqan. Ol - «S» magıstraldy gaz qubyrynyń jospardaǵy segiz kompressor stansasynyń biri. Investısııalyq jobanyń qurylysy men paıdalanylýyn «QazTransGaz» AQ pen «Trans-Asia Gas Pipeline Co. Ltd-nyń» birlesken enshiles kásiporny - «Azııa gaz qubyry» JShS júzege asyryp otyr. Joba jylyna «S» gaz qubyrynyń qýatyn jylyna 25 mlrd tekshe metrge deıin jetkizý, sondaı-aq prosesti aptasyna 7 kún, táýligine 24 saǵat úzdiksiz júrgizý múmkindigin beredi. «Qazaqstan - Qytaı» gaz qubyrynyń kompressor stansasyn iske qosýǵa arnalǵan saltanatty sharaǵa Jambyl oblysynyń ákimi Kárim Kókirekbaev qatysty. О́ńir basshysy osy atalǵan joba aımaq ekonomıkasynda aıryqsha da erekshe mánge ıe ekendigin atap kórsetti.
«Búgin, Táýelsizdik kúni merekesi qarsańynda «Azııa gaz qubyry» kompanııasy Jambyl oblysynda kezekti gaz kompressor stansasyn iske qosyp otyr. Jylyna ol arqyly ótetin 25 mıllıard tekshe metr gazdyń 5 mıllıard tekshesi eksportqa shyǵarylady. «Beıneý - Bozoı - Shymkent» magıstraldy gaz qubyryn iske qosý arqyly «kógildir otyn» tasymaldaýǵa táýeldilikten de arylamyz ári gazdyń qalǵan bóligin eksporttaý múmkindigine de ıe bolamyz. Keler jyly «Otar AGBS-nyń» joba-smetalyq qujattary daıyn bolyp, sol jeli arqyly Moıynqum aýdanynyń toǵyz eldi mekenin gazben qamtý josparlanýda. Qordaı aýdanynyń taýly aýmaqtaǵy 12 aýyly «S» jelisi boıynsha gazben qamtylady», - dedi óńir basshysy.
Stansa saǵatyna 567 myń tekshe metr gaz ótkize alady. «Gaz ınfraqurylymynyń jańa nysany Qazaqstannyń tranzıttik múmkindikterin keńeıtedi. «Qazaqstan - Qytaı» magıstralynda taǵy bir qýatty kompressor stansasynyń iske qosylýy otandyq gaz tasymaldaý júıesin jetildirý boıynsha jasalǵan nyq qadamdardyń biri boldy», - dedi Kárim Kókirekbaev.