Búgin Qazaqstan Respýblıkasynyń Táýelsizdik kúnine oraı Taraz qalasyndaǵy «Qarasý» shaǵyn aýdanynda 80 páterli turǵyn úı paıdalanýǵa berildi. Sharaǵa Jambyl oblysy ákiminiń orynbasary Ǵalymjan Ábdiraıymov qatysyp, turǵyndardy baspanaly bolýymen quttyqtady.
Mereıli merekege oraı uıymdastyrylǵan sharaǵa turǵyndar kóptep jınalyp, qýanyshtarymen bólisti. Jalpy, Táýelsizdik jyldarynda 4,9 mıllıon turǵyn alańdary paıdalanýǵa berilip, 800 myńǵa jýyq jambyldyqtar páterge ıe bolǵan eken. Osynaý qýanyshty dástúr Áýlıeata jerinde búgin de jalǵasyn tapty.
Jalpy, «Nurly jol» ınfraqurylymdy damytý memlekettik baǵdarlamasy aıasynda 2015-2017 jyldary Taraz qalasyndaǵy «Araı» alqabynda jospar boıynsha 19 úıdiń jobasy bekitilip, quny 8,57 mıllıard teńgege 1245 páterli nemese jalpy aýdany 85,5 myń sharshy metr bolatyn 15 úı paıdalanýǵa berilgen. Aǵymdaǵy jyly 319,6 myń sharshy metr turǵyn úı salý jospary tolyǵymen oryndaldy. Ǵalymjan Ábdiraıymov óz sózinde oblysta aǵymdaǵy jyldan bastap memlekettik «Nurly jer» baǵdarlamasy iske asyryla bastaǵanyn, atalǵan baǵdarlama aıasynda 2017 jylǵa Respýblıkalyq bıýdjetten 1,56 mıllıard teńge bólinip, jalpy aýdany 17,7 myń sharshy metr nemese 258 páterli 4 úıdiń qurylysy bastalǵanyn, onyń 11,9 sharshy metri nemese 178 páterli 3 úı aǵymdaǵy jyly paıdalanýǵa berilýde ekenin aıtyp ótti.
Búgin paıdalanýǵa berilip otyrǵan «Qarasý» shaǵyn aýdanyndaǵy 80 páterli turǵyn úıdiń qurylysy bıyl shilde aıynda bastalǵan bolatyn. Páterlerdiń jalpy alańy 4205,6 sharshy metrdi qurasa, tenderlik quny 585,401 mıllıon teńge bolǵan.
Hamıt Esaman,
«Egemen Qazaqstan»
Jambyl oblysy