«Nur Otan» partııasy Saıası keńesiniń keńeıtilgen otyrysynda Elbasy – partııa Tóraǵasy Nursultan Nazarbaev partııa qyzmetin jańǵyrtý jáne onyń saıası jumysyna jańa úlgiler men ádisterdi qoldaný jóninde naqty tapsyrmalar bergen bolatyn. Bul oraıda Elbasy jańǵyrýdyń 2017 jyly jarııalanǵan úsh baǵdarlamasyn iske asyrý barysynda «Nur Otan» partııasynyń rólin aıqyn ári anyq túsiný, baǵdarlamalardy júzege asyrýǵa laıyqty atsalysý úshin partııa óz jumysyn ózgertýdiń naqty joldaryn tabýy tıis ekenin atap ótti. Elbasy, partııa Tóraǵasynyń tapsyrmasy qalaı oryndalýda?
Ońtústik Qazaqstan oblysynda birqatar kezdesýler ótkizgen «Nur Otan» partııasynyń hatshysy Ǵabıdolla Ábdirahymov saparynyń negizgi maqsaty da Elbasy tapsyrmalarynyń sapaly ári merziminde oryndalýyna jergilikti saıası uıym músheleriniń nazaryn aýdarý bolatyn. Sondaı-aq hatshy partııanyń oblystyq fılıalynyń májilis zalynda partııa aktıvimen jıyn ótkizip, nurotandyqtardyń basty maqsattarynyń biri halyqqa jaqyn bolý, eldiń muń-muqtajyn tyńdap, onyń sheshilýine yqpal jasaý ekenin eske saldy. Jıyn barysynda óńirde memlekettik baǵdarlamalardyń oryndalýy boıynsha oblystyq bilim basqarmasynyń basshysy Isataı Saǵyndyqov, densaýlyq saqtaý basqarmasynyń basshysy Muqan Egizbaev, jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev jáne qurylys basqarmasynyń basshysy Quttybek Jamashev habarlama jasady.
Jyl basynan bergi 11 aıda Ońtústik Qazaqstan oblysynyń makroekonomıkalyq kórsetkishterinde oń serpin baıqalýda. О́nerkásip óniminiń kólemi 773,5 mıllıard teńgeni nemese ótken jyldyń tıisti kezeńimen salystyrǵanda 102 paıyzdy quraǵan. О́ńdeý ónerkásibinde, aýyl sharýashylyǵynyń jalpy ónim kóleminde aıtarlyqtaı ósim bar. Jumys istep turǵan shaǵyn jáne orta kásipkerlik sýbektileriniń sany 179 704 birlikke jetip, ótken jyldyń tıisti kezeńimen salystyrǵanda 106,3 paıyz bolǵan. Jyl basynan beri 72 943 jańa jumys orny ashyldy. «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda 1 jeltoqsanǵa deıin 86 950 adam qamtylyp, jyldyq jospar 135,2 paıyzǵa oryndalǵan.
Basqarma basshylarynyń baıandamalarynan keıin bilim, densaýlyq, jumyspen qamtý, qurylys salalaryndaǵy ózekti máseleler talqyǵa salyndy. Baıandamashylarǵa partııa belsendileri tarapynan saýaldar qoıylyp, usynystar aıtyldy. Jıynda partııa hatshysy óńirdegi úsh aýysymdy jáne ǵımaraty apatty jaǵdaıda turǵan mektepterdiń sanyn azaıtý, Ulttyq biryńǵaı testileýdegi nátıjeni joǵarylatý boıynsha atqarylyp jatqan jumystar barysyn surady. Halyqty jumyspen qamtý baǵdarlamasyn júzege asyrýda sybaılas jemqorlyqtyń aldyn alý boıynsha usynystaryn aıtty. Májilis sońynda partııa hatshysy Táýelsizdik kúni merekesine oraı birqatar azamattarǵa «Nur Otan» partııasynyń «Belsendi qyzmeti úshin» omyraý belgisin jáne partııanyń Qurmet gramotasyn tabys etti.
Sondaı-aq Ǵ.Ábdirahymov M.Áýezov atyndaǵy Ońtústik Qazaqstan memlekettik ýnıversıtetinde oblystaǵy jastar uıymdarynyń kóshbasshylarymen, «Jas Otan» uıymynyń tóraǵalarymen kezdesti. Kezdesý barysynda «Nur Otan» partııasy qatarynda 185 myń jas azamat bar ekeni, bul barlyq partııa músheleriniń 18 paıyzyn quraıtyny aıtyldy. Tek bıyldyń ózinde 84 myńnan astam jas qazaqstandyq «Nur Otan» múshesi atanypty. О́tken jyly Elbasynyń tikeleı tapsyrmasy boıynsha partııa Ulttyq biryńǵaı testileýge qatyspaǵan jáne synaqtan súringen 52 myńnan astam túlekke qoldaý kórsetip, olardyń jumysqa ornalasýyna nemese kásibı bilim alýyna jaǵdaı jasaǵan. Bıyl dál osyndaı 55 myń mektep bitirýshi partııanyń qamqorlyǵyna alyndy. Oblystyq jáne aımaqtyq fılıal basshylary aldaǵy ýaqytta bul jumysty jańa formatta jalǵastyrýy tıis. Sondaı-aq kezdesýde stýdentterdiń bilim alý barysynda kezdesetin máseleler, jastar uıymynyń jumysy, partııanyń jańa baǵyttary, jastardy jumysqa ornalastyrý, shetelde bilim alý, «Bolashaq» baǵdarlamasymen bilim alǵan túlekterdiń jaǵdaıyna qatysty máseleler ortaǵa salyndy.
Ǵalymjan ELShIBAI, «Egemen Qazaqstan»