О́tken sáýir aıynda Aqtóbe oblystyq ákimdigi, farmasevtıkalyq qyzmetti qoldaý men damytý qaýymdastyǵy sonymen birge medısınalyq jáne farmasevtıkalyq qyzmetti baqylaý departamenti arasynda dári-dármektiń 106 túriniń baǵasyn ósirmeý jónindegi úsh jaqty memorandýmge qol qoıǵan bolatyn.
Alaıda dál qazirgi kúni óńirdegi memorandým aıasyna kiretin dárihanalarda atalǵan kelisim talatary saqtalmaı kelgeni belgili bolyp otyr. Buǵan deıingi júrgizilgen tekserýler kezinde baǵa memorandýmde kórsetilgen mqshlerden, ıaǵnı osynda qoıylǵan tómengi shektik baǵadan 5-200 teńgege deıin joǵary ekeni anyqtalǵan. Mundaı kórinis múdeli uıymdar tarapynan memorandýmde kórsetilgen talaptar men baǵa kórsetkishterin qadaǵalaý deńgeıi tómen ári jetkiliksiz bolyp kelgenin kórsetse kerek. Sondaı-aq bul iste jurtshylyq pen máslıhat depýtattary da belsendilik tanyta qoımaǵan syńaıly. Atalǵan jáıttiń ózekti ekeni anyq. Sondyqtan da kelisimniń aıaqsyz qalýyna baılanysty másele oblys ákimdiginde dárilik zattar baǵasyn ósirmeýge qatysty arnaıy jıynnyń ótkizilýine túrtki bolǵanyn aıta ketkimiz keledi.
Oblys ákimdiginiń baspasóz qyzmeti taratqan aqparatqa súıensek, óńir turǵyndary dárihanada eń qajetti delinetin dárilik zattardyń jetpeıtini jóninde shaǵymdar jasaǵan. Tipti ózgesin aıtpaǵanda oksalın maıy sekildi keń taraǵan dárilik zatty da dárihanalardan taýyp, satyp alý qıyndyq keltiripti. Áıtse de keıinnen anyqtalǵandaı atalǵan dárilik zattyń tapshylyǵy tumaýdyń paıda bolyp, etek alýymen baılanysty bolypty. Túpteı kelende bul kórinistiń ózi dári-dármek bıznesiniń basy-qasynda júrgender men dárihana ıeleriniń bolýy múmkin oqıǵanyń aldyn alýǵa erterek qam-qareket jasamaǵanyn ańǵartyp turǵandaı.
Sóz sońynda óńirde ókiletti uıymdar men jurtshylyq tarapynan dári-dármek baǵasyn baqylaý men qadaǵalaý jumystary qaıta jańǵyrady, ári qaıta jandanady dep senim artqymyz keledi. О́ıtkeni onyń negizsiz óspeýi árkimge de tıimdi ekeni aıtpasa da belgili ǵoı. Biz búgin tek tıisti kelisim jasalǵan ári soǵan sáıkes sany shekteýli dárihanalarda satylatyn dári túrlerine qatysty ǵana áńgime qozǵadyq. Al budan tys dárihanalardaǵy baǵa joǵaryda atalǵandári men dárilik zattyrdyń 106 túrinen ózgeleriniń baǵasy tipten aspandap ketpesine kim kepil? Bul sirá ózge bir arnaıy taqyryptyń enshisine kirse kerek.
Temir Qusaıyn
"Egemen Qazaqstan"