Temir jolmen jarysa sozylyp jatqan qara jolǵa kóz tigip uzaq qaradyń. Myna poıyzdyń ish pystyrar yrǵaǵynan mezi bola bastaǵanyń ba, túse salyp júgire jónelgiń keldi. Biraq ol joldyń budan da qıyn, budan da uzaq bolaryn sezip, kóńil túkpirinen qylt etken qysyraq-qııaldyń tizginin tez tarta qoıdyń.
Alaıda qysyraq-qııal da qyrsyq; bulqynyp, julqynyp, saǵan des bergisi kelmeı, qara jolǵa qaraı enteleıdi.
Budan jastaý kezińde sen de osy qara joldarmen san ret saparǵa shyqqansyń. Sonda: «Temir jolǵa jaqyn jerdiń oı-shuqyry kóp bolady», deýshi edi janyńdaǵy jigitter.
Symdaı tartylǵan qos relstiń ústimen júıtkigen poıyzdardy kórgende qara joldyń qotyr-shotyry shynynda da kóbeıip ketetin shyǵar, kim bilsin. Sol kezde sen oılaýshy eń: «Shirkin-aı, anaý jumsaq ta jaıly vagonda terbelip bara jatqan jolaýshylarda arman joq!», dep.
Endi mine, óziń de eseıip, kisi bolǵan shaǵyńda sol vagondardyń birinde terbetilip kele jatyp báz-baıaǵy qara jolǵa qyzyǵyp qaraısyń. Senińshe bizdiń qazaqy minezimiz, ejelgi turmys-saltymyz temir joldan góri qara jolǵa jaqyn. Sebebi sol baıaǵy soqpaq jol, súrleý jol, kire joldardyń eń sońǵy urpaǵy da osy – temir jolmen jarysyp jatqan qara jol. Qanyńa tartyp, qaıta-qaıta ańsaı beretiniń de sodan bolar-aý.
Nurǵalı ORAZ, «Egemen Qazaqstan»