Ońtústik Qazaqstan oblysy tabıǵı ósim, ıaǵnı bala týý kórsetkishi boıynsha elimizde kósh bastap tur. Iаǵnı, balabaqsha, mektep kóptep salynýy tıis.
Mektepke deıingi mekemelerge suranys aýdandarda da barshylyq. Degenmen, sońǵy jyldary memlekettik-jekemenshik áriptestik aıasynda ashylǵan balabaqshalar esebinen de turǵyndar suranysyn qamtamasyz etý máselesi sheshimin tabýda.
Máselen, memlekettik «Balapan» baǵdarlamasy aıasynda osy ýaqytqa deıin Túlkibas aýdanynda 37 balabaqsha ashylǵan. Qazirgi tańda aýdandaǵy 3-6 jastaǵy balalardy mektepke deıingi tárbıemen jáne oqytýymen qamtý 92,6 paıyzdy qurap otyr. Aldaǵy ýaqytta memlekettik-jekemenshik áriptestik boıynsha salynatyn balabaqshalardy kóbeıtip, kórsetkishti 100 paıyzǵa jetkizý kózdelýde.
Túlkibas aýdanyna is-saparmen barǵan Ońtústik Qazaqstan oblysynyń ákimi Janseıit Túımebaev Aqbıik aýylyndaǵy memlekettik-jekemenshik áriptestik retinde salynǵan 100 oryndyq balabaqshanyń ashylýyna qatysty. Aýyl turǵyndaryn jańa nysannyń ashylýymen quttyqtady. Jańa ashylǵan mekemede aýyldyń 31 turǵyny jumyspen qamtylǵan. «Roproekt» JShS merdiger mekemesi qurylysyn júrgizgen nysannyń jalpy smetalyq quny - 231 mln. teńgege jýyq.
Sondaı-aq, oblys basshysy Kemerbastaý aýylyndaǵy kúrdeli jóndeýden ótken mádenıet úıiniń jumysymen tanysty. Nysandy kúrdeli jóndeýden ótkizý úshin jergilikti bıýdjetten 57 mln. teńgege jýyq qarjy jumsalǵan. Jóndeý jumystaryn merdiger «BıMırQurylys» JShS-i júrgizipti. Qazirgi tańda 300 oryndyq mádenıet úıinde 2 qyzmetker jumys isteıdi.
Ǵalymjan ELShIBAI, «Egemen Qazaqstan»