Túrkistan oblysy Shardara aýdanynda 70 jastaǵy densaýlyǵy nashar ákesin júıeli túrde uryp kelgen Almas Sadaqbaevtyń jazasy qatańdatyldy. Túrkistan soty prokýratýranyń apellıasııalyq ótinishhatyn qarap, jaza merzimin 5 jyldan 6 jylǵa uzartty, dep jazady Egemen.kz.
«Sottalǵan azamattyń jaza merzimi ulǵaıtyldy: 5 jyldyń ornyna 6 jyl bas bostandyǵynan aıyrý jazasy taǵaıyndaldy. Al aıyptaý baptary ózgerissiz qaldy («Azaptaý» jáne «Densaýlyqqa qasaqana ortasha aýyrlyqtaǵy zııan keltirý»), alaıda jaza qatańdatyldy», delingen oblystyq sot taratqan habarlamada.
Eske salaıyq, buǵan deıin Almas Sadaqbaev sot barysynda aıybyn moıyndaǵan. Al memlekettik aıyptaýshy sottalýshyny 6 jyl 2 aı bas bostandyǵynan aıyrý jazasyn taǵaıyndaýdy suraǵan.
Isti júrgizgen sýdıa aıyptalýshynyń buryn sotty bolmaǵanyn, kámeletke tolmaǵan balalarynyń baryn jáne áreketin moıyndap, ókinish bildirgenin eskerip, 5 jyl merzimge bas bostandyǵynan aıyrý jazasyn taǵaıyndaǵan edi.