Gazet betterin paraqtaıtyn oqyrmandarǵa fototilshi Serik Maıemerovtiń esimi jaqsy tanys. Jýrnalıstıka salasyndaǵy jumysty 2000 jyly «Qazaqstan-Aqtaý» telearnasynda operator bolyp bastaǵan Serik 2006 jyldan beri oblystyq «Mańǵystaý» gazetinde fototilshi qyzmetin atqaryp keledi.
О́ńirde ótken irili-usaqty sharalardan bastap, mańyzdy basqosý, jıyndardyń basy-qasynan tabylatyn Serik – óz isiniń úzdigi, qas-qaǵym sátti qalt jibermeıtin qyraǵy fotograf. Onyń jeke muraǵatynan dala men qala, kári men jas, ómirdiń kez kelgen kórinisteri, tabıǵat tamashalary, tirshilik túıtkilderi, barlyq sala tynysy, eńbek ujymdarynyń qalyptasý kezeńderi, jekelegen adamdardyń sýretteri men belgili tulǵalardyń óńirge saparyna qatysty san túrli sýretterdi taba alasyz. Ár sýret tunyp turǵan syr desek, sýretter tutasa kele ótken shaqtyń tarıhyn tolǵaı jóneletindeı.
Serik «sýret kórmesin ótkizsem» degen kópten bergi armanyn bıyl Tuńǵysh Prezıdent kúni jáne elimizdiń Táýelsizdik merekesi qarsańynda júzege asyrdy. «Elbasy jáne rýhy jańǵyrǵan Mańǵystaý» taqyrybyndaǵy kórmege avtordyń 90-jyldardaǵy tyrnaqaldy týyndylarynan bastap, kúni búginge deıingi iriktelgen 100-den astam shyǵarmalary qoıyldy jáne sýretterdiń barlyǵy Elbasynyń Mańǵystaý óńirine ár jyldary jasaǵan saparlarynan syr shertedi.
–Maǵan Nursultan Nazarbaev Mańǵystaýǵa kelgen ár saparynda sýretke túsirý múmkindigi buıyrdy. Sonymen qatar tek Mańǵystaýda emes, 2015 jylǵy Astanadaǵy ınaýgýrasııa sátin jáne áskerı nysandarǵa barǵan sátterin de túsirgen edim, osy ádemi kórinisterdi mereke qarsańynda halyqpen bólisýdi jón sanadym, – deıdi Serik Maıemerov.
2007 jyly ótken «Kaspıı – dostyq teńizi» halyqaralyq festıvaliniń jáne 2013 jyly Aqtaý qalasynyń 50 jyldyǵyna oraı ótkizilgen fotokórmeniń bas júldegeri, 2014 jyly Astana qalasynda respýblıkalyq deńgeıde uıymdastyrylǵan «Tabıǵat – tal besik» fotobaıqaýynyń jeńimpazy, Mańǵystaý oblysy ákiminiń «Qurmet gramotasyna», birneshe salalyq basqarmalardyń marapattaryna ıe Serik – Jýrnalıster odaǵynyń múshesi, respýblıkalyq «Fotoóner» qoǵamdyq birlestiginiń Batys Qazaqstan oblysy boıynsha tóraǵasy.
Bala kezinde erterek ómirden ótken aǵasy Ospannyń qasynan bir eli qalmaı, aýyldyq jerde qarańǵy bólmede sýret shyǵarýmen óz qabiletin ushtaǵan Serik ónerde ózine aqyl-keńes berip, sýretke túsirý áleminiń qyr-syryn úıretken Aısaǵalı Qydyr, Beıbit Nurseıit syndy aǵalarynyń esimderin qurmetpen ataıdy.
S.Maıemerovtiń sýret kórmesine Mańǵystaý oblysynyń ákimi E.Toǵjanov bastaǵan ákimdik qyzmetkerleri, basqarmalar basshylary, sondaı-aq óner adamdary men áriptesteri, jastar jınaldy. Olar sapasy men mazmuny birin-biri tolyqtyrǵan baı sýret kórmesine rızashylyqtaryn bildirip, avtor jumysyna sáttilik tiledi.
Gúlaıym ShYNTEMIRQYZY, «Egemen Qazaqstan»
Mańǵystaý oblysy