Elorda tarıhynda tuńǵysh ret keń kólemdi qysqy marafon bastaldy. Jarystyń uıymdastyrylýyna «Marat#ON» marafon klýbynyń qurmetti múshesi, ataqty qazaqstandyq marafonshy Marat Jylanbaev, Astana qalasynyń ákimdiginiń buqaralyq sport is-sharalaryn ótkizý jónindegi dıreksııasynyń jetekshisi Azamat Imashev, QR Jeńil atletıka federasııasy muryndyq bolyp otyr.
Jarysqa Qazaqstannyń túkpir túkpirinen barlyǵy 400 sportshy qatysýǵa nıet bildirdi. Qysqy marafon úsh qashyqtyq - 42, 21 men 10 shaqyrym boıynsha ótýde.
«Bas kezinde 300 oryn 30 saǵattyń ishinde satylyp ketti. Sondyqtan jarystyń uıymdastyrý komıteti qosymsha taǵy da 100 oryn bólgen bolatyn, alaıda ol da 2 saǵattyń ishinde taýsylyp qaldy. Shynyn aıtsaq, biz ondaı qyzyǵýshylyq bolady dep oılaǵan joqpyz. Osynyń ózi xalyqtyń sportqa degen yntasyn kórsetse kerek», - deıdi Astana Winter Marathon uıymdastyrý komıtetiniń baspasóz xatshysy Ásem Ábdiraıymova.
Onyń aıtýynsha, qatysýshylar árbir qashyqtyqqa bólek-bólek tirkelgen. Sondaı-aq, 4-6 myń teńge kóleminde jarna jasady. Sportshylardyń basym bóligi - 207 adam 10 shaqyrymdy tańdady. 144 adam 22 shaqyrymǵa, al 49 sportshy tolyq marafon, ıaǵnı 42 shaqyrymǵa táýekel etken.
Jarysqa tirkelgenderdiń ishinde - QR Prezıdent Ákimshiliginiń basshysy Ádilbek Jaqsybekov, «Qazaqstan damý banki» AQ basqarma tóraǵasy Bolat Jámishev, QR Bas prokýratýrasy quqyqtyq statıstıka jáne arnaıy esepke alý jónindegi komıtetiniń tóraǵasy Baǵdat Mýsın, bıznesmen Aıdyn Raxymbaev jáne taǵy basqalar bar.
Sonymen, «Astana Winter Marathon» jarysy Trıatlon parkinde ótip jatyr. Túske taman qysqa qashyqtyqtardyń jeńimpazdary anyqtalsa, tústen keıin tolyq marafonnyń júldeleri tabystalady.
Al jarystyń uıymdastyrýshysy joǵaryda aıtylǵandaı Gınnes rekordtar kitabynyń jeti dúrkin rekordshy, halyqaralyq deńgeıdegi sport sheberi Marat Jylanbaev. Ol birneshe ret qysqy jarystarda alys qashyqtarǵa júgirgen. Al 1992 jyly Ekibastuzdan Almatyǵa deıin ekstremaldy tómen temperatýrada 1 400 shaqyrymdy baǵyndyrǵan.