Memleket basshysy jasyl ekonomıka týraly oı bólisti.
Prezıdent álemde kómirtegi, lastaný máselesi talqylanyp jatqanyn aıta kelip, Qazaqstan ekonomıkasy úlken bolmaǵandyqtan ekologııasy nashar elderdiń kóshinde emes ekenin jetkizdi. Sondaı-aq, ekonomıkasy úlken bolǵandyqtan AQSh bul tizimde birinshi orynda ekenin aıtty.
«EKSPO barysynda 190 jańa ǵylymı bastama kóterildi. Bárin qoldanysqa engizýge bolady. Men olardy ózimizge jazyp alyp, saqtaýymyz kerektigin aıtyp kelemin. Qazir elimizdiń ýnıversıtetteri osy jasyl ekonomıkany oılap shyǵarǵandarmen birge memorandýmǵa qol qoıdy. Olar qazir birge jumys istep júr. Sondaı-aq, Qazaqstannyń ulttyq kompanııalary da osyndaı jobalardy júzege asyrý úshin bas-aıaǵy 45 memorandýmǵa qol qoıdy. EKSPO aıaqtalǵanmen, munda jasyl ekonomıka ortalyǵy qurylady», dedi Elbasy.
Memleket basshysy jahandyq kórme barysynda usynylǵan bastamalardy aldaǵy ýaqytta qoldanysqa engizý jaıy qaralatynyn jetkizdi. Sondaı-aq, EKSPO-ny ótkizý úshin 160 memleketpen talasqa túskenin eske salyp ótti.
Budan bólek, elimizdegi kún, jel stansalary týraly da aıtyp ótti.
«Bizde óte mańyzdy kún stansalary bar. Jambyl oblysynda, Astana mańynda, Qaraǵandyda bolmaǵan, qazir paıda boldy. Ekinshiden, jel stansalary da elimizde ashyldy. Ony Ereımentaýǵa baryp kórýge bolady», dedi Nursultan Nazarbaev.
Elbasy sondaı-aq, 2025 jylǵa qaraı energııanyń 3%-y balamaly kózderden bolýy kerektigin, sondaı-aq, energııanyń 15%-yn óndirýimiz qajet ekenin aıtty.
«Qazaqstan kómirge baı memleket. Energııamyzdyń 66%-y kómirdiń esebinen óndiriledi. Qazir atmosferaǵa qaldyq zattardy shyǵarmaıtyndaı bloktar qoıylyp jatyr. Al Almaty qalasy nemese ózge de oryndar avtomobılderdiń esebinen lastanyp otyr», dedi Elbasy.
Ol sondaı-aq, 3040 qoǵamdyq kólik qurastyrylǵanyn, onyń jartysy gazben júretinin aıtyp ótti. Budan ózge Qostanaıda elektromobılder qurastyrylyp jatqanyn, olardy aldymen elimizdiń ekologııasy aqsap turǵan óńirlerge jiberý kerektigin aıtty. Sonymen qatar, 1998 jylǵa taman Qazaqstanda 700 myń avtokólik bolsa, qazir 5 mıllıonǵa jetkenin aıtyp ótti.
«Moıyndaý kerek, balamaly energııa kózderi, ıaǵnı kún, jel kóptegen máselelerdi sheshedi. Qazir ekologııalyq qıyndyqqa tap bolǵan birneshe memleket osy isti qolǵa alyp, kóp qarjysyn bólip otyr», dedi Nursultan Nazarbaev.