Nursultan Nazarbaev TMD elderi basshylarynyń beıresmı sammıtine qatysýǵa shaqyrǵany úshin Vladımır Pýtınge alǵys bildirip, ótken kelissózderdiń tabysty bolǵanyn aıtty.
– Elderimiz arasynda sheshimin tappaǵan másele joq. Táýelsizdiktiń 26 jyly ishinde biz bir-birimizge jaqyn bola tústik, sharttyq bazany qalyptastyryp, ózara yntymaqtastyq úshin qolaıly jaǵdaı jasadyq, – dedi Qazaqstan Prezıdenti.
Memleket basshysy Eýrazııalyq ıntegrasııa máselelerine erekshe toqtalyp, Qazaqstan men Reseı arasyndaǵy yntymaqtastyqtyń tabysty ekenin atap ótti.
– Biz barlyq máseleler boıynsha, sonyń ishinde Kaspıı teńizi, «Baıqońyr» ǵarysh aılaǵy jóninde kelissóz júrgizdik. Ǵaryshty ıgerý salasynda ekologııalyq turǵydan taza janarmaımen jumys isteıtin zymyran tasýshylardyń jańa túrin jasaý josparlanyp otyr, – dedi Nursultan Nazarbaev.
Reseı Federasııasynyń Prezıdenti ekijaqty qarym-qatynastar tabysty damyp kele jatqanyna toqtalyp, joǵary sarapshylyq deńgeıdegi mamandardyń sıfrlyq tehnologııalardy damytýǵa arnalǵan kezdesýin Qazaqstanda ótkizý jónindegi bastamasy úshin Nursultan Nazarbaevqa alǵys aıtty.
– Bıylǵy 10 aıdyń ishinde elderimiz arasyndaǵy taýar aınalymynyń ósimi 34 paıyzdy qurady. Eń mańyzdysy ári perspektıvaǵa baǵyttalǵany – sıfrlyq tehnologııalar salasyndaǵy bizdiń yntymaqtastyǵymyz ben birlesken jumysymyz. Qazaqstan ekonomıka, óńirlik jáne halyqaralyq qaýipsizdik, sondaı-aq elderimizdiń qorǵanys qabiletin qamtamasyz etý salalarynda bizdiń negizgi seriktesimiz boldy jáne solaı bolyp qala bermek, – dedi Reseı Prezıdenti.
Sondaı-aq, kezdesý barysynda memleketter basshylary energetıka, ǵaryshty ıgerý jáne sıfrlyq ekonomıka salasyndaǵy yntymaqtastyq máselelerin talqylady.