Oblystyq «Qazaqstan halqy Assambleıasy» ǵımaratynda belgili qoǵam qaıratkeri, ǵalym, memlekettik tildiń janashyry, «Dostyq» jáne «Parasat» ordenderiniń ıegeri Asyly Osmannyń kezdesý keshi ótti dep habarlaıdy «Egemen.kz» tilshisi.
Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy ulttyq birgeılikti saqtaý, ulttyq qod, barsha qazaqstandyqtardy biriktirýshi memlekettik tildiń mártebesin kóterý jaıy keńinen sóz bolǵan rýhanı keshke zııaly qaýym ókilderi, qoǵamdyq uıymdar jáne oblystyq etnomádenı birlestikterdiń tóraǵalary men músheleri, oqý oryndarynyń oqytýshylary men stýdentter qatysty.
«Álemde qazaq halqyndaı júregi keń, kóńili darhan ult joq dep sanaımyn. Qıyn-qystaý kezeńde barsha etnostardy qushaǵyna alyp, baýyryna basty. О́z basyndaǵy qıyndyǵyna qaramaı bir nanyn bólip berdi. Endeshe, Qazaqtyń nanyn jegen adam, tilin de bilýi tıis!
Dál qazirgi tańda biz qoı ústine boztorǵaı jumyrtqalaǵan zamanda ómir súrýdemiz. Turaqtylyq degenimiz sol. Bolashaǵymyzdy baıandy etý úshin Elbasymyzdyń júıeli saıasatyn tý etip, berekeli birligimizdi bekemdep, qazaq halqynyń aınalasyna toptasa túsýimiz tıis, - dedi kezdesýde Asyly Álıqyzy.
Kesh sońynda oblystyq Qazaqstan halqy Assambleıasy tóraǵasynyń orynbasary Muratáli Qalmuratov qadirli qonaqqa alǵys bildirip, gúl shoǵyn tartý etti.
Baqtııar TAIJAN,
«Egemen Qazaqstan».
Ońtústik Qazaqstan oblysy.