Shymkent qalasyndaǵy oblystyq orys drama teatrynda jyl qorytyndysy boıynsha ár salada jemisti eńbek etken, halyqqa sapaly qyzmet kórsetýde abyroı bıiginen kóringen azamattarǵa «Jyl úzdigi» nomınasııalaryn tapsyrý saltanaty ótti.
Sharaǵa qatysqan oblys ákimi J.Túımebaev jyl boıy atqarǵan isti baǵalap, sol jolda jemisti eńbek etken azamattar men eńbek ujymdaryn 52 atalym boıynsha marapattap, quttyqtady.
«Qazaqylyqtyń qaımaǵy buzylmaǵan óńir – Ońtústik Qazaqstan oblysy jyldan jylǵa órkendep keledi. Bul Ult Kóshbasshysy Nursultan Ábishuly Nazarbaevtyń sarabdal saıasatynyń jáne barsha qazaqstandyqtardyń qajyrly eńbeginiń jemisi. Elbasymyz óziniń rýhanı jańǵyrý jónindegi baǵdarlamalyq maqalasynda «Básekelik qabilet degenimiz – ulttyń aımaqtyq nemese jahandyq naryqtaǵy baǵasy, bolmasa sapasy jóninen ózgelerden utymdy dúnıe usyna alýy. Bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady» dep atap kórsetken bolatyn. Sizder óz salalaryńyzda qajyrly eńbek etip, tabandylyq tanytyp, shyǵarmashylyq izdenisterińizdiń órisin keńeıte bildińizder. Osy izgi qasıetterińizdiń arqasynda júzden júırik, myńnan tulpar atandyńyzdar. Osynaý jetistikterińizben shyn júrekten quttyqtaımyn», - dedi Janseıit Qanseıituly.
Jyl úzdikteriniń qatarynda sazger Muhtar Quralov «Jyldyń úzdik kompozıtory», aıtysker aqyn Jarqynbek Naýshabekov «Jyldyń úzdik aqyny», Dýlat Turantegi «Jyldyń úzdik jazýshysy», «Bórte Mılka» JShS-nyń dırektory Nuraly Ábishev «Úzdik ınnovasııalyq joba», «Petro Kazahstan Oıl Prodaks» JShS-nyń dırektory Szıan Shı «Jyldyń úzdik ınvestory» atalymyn jeńip aldy.
Sondaı-aq, Qazaqstan Sýretshiler odaǵynyń oblystyq fılıalynyń tóraǵasy Nurlan Shılibaev «Jyldyń úzdik sýretshisi», «NAR TV» telearnasynyń dırektory Ersultan Ámirbek «Jyldyń úzdik jýrnalısi», Shymkent Ýnıversıtetiniń aǵa oqytýshysy Aıjarqyn Sadyqbekova «Jyldyń úzdik ǵalymy», Kentaý qalalyq №3 «Bilim-ınnovasııa» er balalar lıseı-ınternatynyń muǵalimi Ǵanı Orynbasarov «Jyldyń úzdik ustazy», Shymkent qalalyq №2 oblystyq perınataldyq ortalyǵynyń bólim meńgerýshisi Gúlnar Álmenova «Jyldyń úzdik dárigeri», bokstan álem chempıony Qaırat Eralıev «Jyldyń úzdik sportshysy» atandy. Jyl qorytyndysymen úzdik dep tanylǵandarǵa oblys ákiminiń dıplomy men estelik kádesyılar tabystaldy.
Saltanatty jıyn barysynda sonymen qatar, II dárejeli «Dostyq» ordenimen «Sobkor», «RABAT redaksııasy» jáne «Data» JShS-nyń dırektory Valentına Kýlıkova, «Qurmet» ordenimen «Iassy» konsorsıýmynyń tóraǵasy Úmbet Júsipbaev, «Oblystyń Qurmetti azamaty» ataǵymen Dosym Súleev, Asyly Osman, Serikjan Seıitjanov, О́mirzaq Meldehanov, Orynbaı Daıyrbekovter marapattaldy. Al, «Oblysqa eńbek sińirgeni úshin» medali Jumabek Esimovke tabystaldy.
Sondaı-aq, merekelik sharada Elbasynyń «Bolashaqqa baǵdar: rýhanı jańǵyrý» maqalasy sheńberinde jyl boıy uıymdastyrylǵan «Týǵan jer – altyn besigim» oblystyq festıvaliniń jeńimpazdary marapattaldy. Bas júldeni ıemdengen Tólebı aýdanyna gazel avtokóliginiń kilti tabystalsa, alǵashqy úshtikten kóringen Sozaq, Báıdibek, Otyrar aýdandary jeńil avtokólikterdi ıemdendi. Sonymen birge osy baǵdarlamalyq maqalasynda aıtylǵan «Qazaqstandaǵy 100 jańa esim» jobasyna Ońtústik Qazaqstan oblysynan engizilgen azamattarda qoshemetke ıe boldy.
Saltanatty shara jergilikti ónerpazdar daıyndaǵan merekelik konsertpen jalǵasty.