Bıyl Ońtústik Qazaqstan oblysynda halyqty tabıǵı gazben qamtý jumystary qarqyn aldy. Oblysta 89 nysannyń gazdandyrý qurylysy júrgizilip, jumys kólemi ótken jylmen salystyrǵanda 3 esege artqan. Atalǵan jumystarǵa respýblıkalyq jáne oblystyq bıýdjetten 13,4 mlrd teńge kóleminde qarjy bólingen. Bu ltýraly oblystyq energetıka jáne turǵyn úı-kommýnaldyq sharýashylyq basqarmasy málim etti.
Bıylǵy jyly gazdandyrý boıynsha atqarylǵan jumystardyń nátıjesinde jyl sońynda 59 nysan el ıgiligine tapsyrylǵan. Onyń ishinde 70myńǵa jýyq halyq mekendeıtin 44 eldi meken «kógildir otynnyń» qyzyǵyn kóre bastaıdy. Osylaısha, tabıǵı gazben qamtý kórsetkishi 2018 jyldyń 1qańtarynda 344 eldi mekenge jetpek. Bul degenimiz oblystyń 1 mln 825 307 turǵyny gazben qamtylmaq. Osy jyly qurylysy júrgen qalǵan nysandar jetkizgish gaz qubyrlary men AGTS-ter bolyp otyr. Bul kórsetkish ótken 2016 jylmen salystyrǵanda 17 paıyzǵa ósken.
Aıta keteıik, óńir basshysy Janseıit Túımebaevtyń tapsyrmasymen oblystyń eldi mekenderin 2017-2021 jyldar aralyǵynda gazdandyrýdyń keshendi is-shara jospary ázirlengen bolatyn. Osyǵan sáıkes 2021 jyly oblysta qosymsha 383 eldi mekenge tabıǵı gaz jetkizý josparlanýda.
Budan bólek, oblystyń ekonomıkasynyń barlyq sektorlaryn tabıǵı gazben 2050 jyldarǵa deıin qamtamasyz etý maqsatynda 15 avtomattandyrylǵan gaz taratý stansııalarynyń (AGTS) qurylystary da kirip otyr. Onyń tórteýi Túrkistan, Iqan, Saıram, Báıdibek aýdan-qalalarynda el ıgiligine berilgen. Úsh avtomattandyrylǵan gaz taratý stansııalarynyń qurylysy jyl sońyna deıin aıaqtalady dep kútilýde.