Almaty oblysynyń on jasar turǵyny Jibek Qulymbet djıý-djıtsý sportymen aınalysyp, talaı jarystarda top jaryp júrgen oqýshy. Jibek sııaqty jeńimpaz qyzdarymyz kóp qoı, onyń qandaı artyqshylyǵy bar deseńiz joǵarydaǵy sýretke qarańyz. Jibek qyzdardy bylaı qoıyp, er balalar arasynda ótetin talaı jarystarda jigitterge júlde bermeı júrgen jeńimpaz qyz.
Kishkentaıynan janyna sportty serik etken Jibek «Saǵadat batyr» sport klýbynda jattyǵý jasaıdy. Bıyl ǵana Almatyda ótken О́zbekstan, Qyrǵyzstan, Tájikstan, Reseı, Brazılııa elderiniń sportshylary bas qosqan halyqaralyq týrnırde er balalar arasynda 27 kg salmaq dárejesinde jeńimpaz atanǵan ol talaıdy tańdaı qaqtyrdy. Ásirese, aqtyq synda Tájikstannyń birneshe dúrkin chempıony Madsýrdjan Sabýrovty aıqyn basymdylyqpen jeńgenin jattyqtyrýshylary men dostary áli kúnge deıin maqtanyshpen aıtyp júr. Bapkeriniń aıtýynsha, atalǵan týrnırde osy salmaq boıynsha qyzdar bolmaǵandyqtan, uıymdastyrýshylar alqasy Jibektiń er balalar arasynda baq synaýyn uıǵarǵan.
«Jibektiń sporttyq múmkindigine qarap, biz ruqsatymyzdy berdik. Keı jaǵdaılarda bul sporttyń erejesine sáıkes 10-12 jasar jasóspirimderdi ul-qyz dep jiktep jatpaıdy. Tipti álem chempıonattarynyń ózinde osy jas aralyǵyndaǵy sportshylar jynysyna qaramaı salmaǵy saı kelse beldese beredi. Bul jarysta ǵana emes, elimizde ótken talaı týrnırde Jibek dál osylaı jeńimpaz atanyp júr. Jibektiń sportqa qyzyǵýshylyǵy, fızıkalyq múmkindigi qatarlastarynan áldeqaıda joǵary. Osy qarqynmen jalǵastyra berse, Jibektiń bolashaǵynan mol úmit kútýge bolady», deıdi jattyqtyrýshysy Nursultan Orynbasarov.
Jibek sportta ǵana emes, oqýda da úzdikter qatarynda. Anasy Qulpynaı Qulymbetova qyzynyń kishkentaıynan zerek bolyp óskenin jáne sportpen aınalysqaly beri kóp jetistikterge qol jetkizgenin aıtady. Bizde óz tarapymyzdan talantty qyzǵa tabys tiledik. Bálkim, bolashaqta úlken dodalarda kók Týymyzdy kókte jelbiretip, Ánuranymyzdy álemge tyńdatatyn sportshylarymyzdyń biri osy qarshadaı qyz shyǵar? Jeńisteriń kóp bolsyn, Jibek!
Arman OKTIаBR,
«Egemen Qazaqstan»
ALMATY