Memleket basshysy Qazaqstan halqyna Joldaýynda 2016-2017 jyldary zeınetaqy men járdemaqy úsh ret kóbeıgenin atap ótti.
Bazalyq zeınetaqy, jalpy alǵanda, 29 prosentke, yntymaqty zeınetaqy 32 prosentke, bala týýǵa baılanysty járdemaqy 37 prosentke, al múgedekter men asyraýshysynan aıyrylǵandarǵa tólenetin járdemaqynyń árqaısysy 43 prosentke ósti.
Densaýlyq saqtaý salasyndaǵy qyzmetkerlerdiń jalaqysy 28 prosentke deıin, bilim berý salasy qyzmetkerleriniń jalaqysy 29 prosentke deıin, áleýmettik qorǵaý salasy qyzmetkerleriniń jalaqysy 40 prosentke deıin, «B» korpýsyndaǵy memlekettik qyzmetshilerdiń jalaqysy 30 prosentke, stıpendııalar 25 prosentke ósti.
«Daǵdarys zamany. Áıtse de, álemniń sanaýly ǵana elderi áleýmettik salaǵa jumsaıtyn shyǵyndaryn osylaı arttyra aldy. Respýblıkalyq bıýdjettiń áleýmettik salaǵa bólingen shyǵyny 2018 jyly 12 prosentke ósip, 4,1 trıllıon teńgeden asty. Áleýmettik tólemderdi, sonyń ishinde zeınetaqyny ósirý 3 mıllıonnan astam qazaqstandyqtyń tabystaryn kóbeıtedi. 2018 jyldyń 1 qańtarynan bastap yntymaqty zeınetaqy 8 prosentke artty», dedi Elbasy.
Múgedekterge, asyraýshysynan aıyrylǵan jáne múgedek balalar tárbıelep otyrǵan otbasylaryna arnalǵan járdemaqylar 16 prosentke deıin ósti. 2018 jyldyń 1 shildesinen bastap bazalyq zeınetaqy eńbek ótiline baılanysty ortasha alǵanda 1,8 ese kóbeıetin bolady.
«Budan bólek, 2018 jyldyń 1 shildesinen bastap kámeletke tolǵan, bala kezinen birinshi toptaǵy múgedekterdi baǵyp otyrǵan ata-analar úshin qosymsha memlekettik járdemaqyny engizýdi tapsyramyn. Bir eń tómengi kúnkóris deńgeıinen kem emes mundaı járdemaqyny shamamen 14 myń otbasy aı saıyn alady. 2018 jyly osy maqsatqa 3 mıllıard teńgege deıin qarjy qajet bolady», dedi Memleket basshysy.
Memleket basshysy muǵalim mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 prosentke kóbeıtýdi tapsyrdy.
«Jańartylǵan mazmun degenimiz – halyqaralyq standarttarǵa saı keletin jáne Nazarbaev zııatkerlik mektepterinde beıimdelýden ótken zamanaýı oqý baǵdarlamalary. Bular bizdiń balalarymyzǵa qajetti fýnksıonaldyq saýattylyq pen synı turǵydan oılaý qabiletin darytady», dedi Elbasy.
Nursultan Nazarbaev sondaı-aq, 2018 jyly kategorııalar arasyndaǵy alshaqtyqty arttyryp, muǵalimder úshin biliktilik deńgeıin eskeretin kategorııalardyń jańa kestesin engizýdi tapsyrdy.
«Kategorııalardy búkil álemde qoldanylyp júrgen ulttyq biliktilik test arqyly berý kerek. Bul pedagogtardy ózderin udaıy jetildirýge yntalandyratyn bolady. Nátıjesinde, muǵalimderdiń jalaqysy biliktiliginiń rastalýyna baılanysty tutastaı alǵanda 30 prosentten 50 prosentke deıin ósedi. Bul úshin bıyl qosymsha 67 mıllıard teńge bólý qajet», delingen Joldaýda.