«HeadHunter» kompanııasy Reseıdiń eńbek naryǵynyń qozǵalysyna zertteýler júrgize kele taıaýdaǵy jyldary osy naryqta qajettiligi artatyn 15 kásip túrin ataǵan.
Olardyń qataryna bıoınjener, qaıta jańǵyrtylatyn qýat kózderiniń ınjeneri, neıropsıholog, bıoınformatık, baǵdarlama ázirleýshi, ınjener-jobalaýshy, 3D baspa ınjeneri, gendik ınjenerııa mamany, vırtýaldy shyndyq dızaıneri, vırtýaldy shyndyq sáýletshisi, bıofarmakolog sekildi mamandyqtar engizilipti.
«Antal Kazakhstan» rekrýtıngtik kompanııasy bul zertteýdiń Qazaqstan úshin de mańyzdy ekendigin aıtady.
«Qazirgi tehnologııalardyń damýy barlyq elderde jańa uqsas mamandyqtardyń paıda bolýyna alyp keledi. Degenmen, atalǵan bolashaq kásip túrleriniń barlyǵy birdeı on jyl óte salysymen birden paıda bola ketpeýi de múmkin. Máselen, vırtýaldy shyndyq dızaıneri erterek paıda bolýy, al basqalary sál keıinirek týyndaýy múmkin», deıdi «Antal Kazakhstan» basshysy Anna Kovınskaıa.
Onyń aıtýynsha, bıznes-taldaýshy, qarjyger mamandyqtaryna on jyl ótkennen keıin de eńbek naryǵyndaǵy suranys burynǵysynsha saqtalynyp qala berýi tıis. О́ıtkeni kompanııalar ózderiniń qarjysyn qaıda salǵandary durys ekendigin jáne bul qarjynyń olarǵa qanshalyqty tabys ákeletindikterin bilýge osy mamandyqtar arqyly qol jetkizedi. Frılanserler, joba menedjerleri neǵurlym kóbirek qajet etiletin bolady. Qazirgi IT-mamandar da jumyssyz qalmaıtyndyǵy anyq.
«HeadHunter» Kazahstan kompanııasy mamandarynyń aıtýynsha, qazirgi buqaralyq sıpat alǵan satý menedjeri, ákimshilik qyzmetker, býhgalter jáne aqparattyq tehnologııalar mamandary sekildi mamandyqtar da bolashaqta mańyzyn joımaq emes. Biraq sonymen birge osylardyń ortasynan múldem jańa mamandyq túrleri de paıda bolýy ábden múmkin.
«Aqparattyq tehnologııalar barǵan saıyn qarqyn alyp, adam ómiri men qyzmetiniń barlyq salalaryna tereńdeı enýde. Mine, osy úderistiń ekpinimen óndiris pen qyzmettiń ártúrli salalarynyń ushtasqan jerinde jańa mamandyqtar men kásip túrleri paıda bolatyndyǵy anyq. Máselen, IT-dáriger, «aqyldy» joldar qurylysshylary, medısınalyq robottardy jobalaýshylar, sıfrly tilshi mamandar, genetıkalyq keńes berýshiler, oıyn tájirıbeshileri sekildi mamandyqtar kóp ótpeı-aq ómirge kelýi múmkin», deıdi atalǵan kompanııanyń bolashaq mamandyqtardy zertteý isine qatysyp júrgen mamandary.
Iá, ómir qazirgi tehnologııalyq jańalyqtardyń yqpalymen jyldan-jylǵa qaryshtap alǵa basyp barady. Osydan 20-30 jyl burynǵy ómir men qazirgi ómirdiń arasynda aıyrmashylyq kóp. Muny sezinetin, bastan keshiretin shaqqa da jetip otyrmyz. Máselen, alǵashqy ınternettik tehnologııalardyń birin ómirge ákelgen Maıkrosoft kompanııasynyń negizin qalaýshy Bıll Geıts osydan 15 jyldaı ýaqyt buryn «ınternettiń syrtynda qalǵan adamdar bolashaqta ómirdiń de syrtynda qalady» degen bolatyn. Qazir osy sóz rasqa aınalyp otyr. Sol ınternettiń arqasynda biz vırtýaldy ómirmen betpe-bet keldik. Vırtýaldy ómirdiń arqasynda bir- birine jaqyn, tipti kórshi turatyn adamdardyń arasy alshaqtady da, bir-birinen alys, tipti eki memlekette ómir súrip jatqan adamdardyń arasy jaqyndady. Adamdar vırtýaldy ómirdiń múmkindikteri arqasynda qashyqta otyryp-aq jumys isteı beretin boldy.
Máselen, frılanser qyzmetiniń mánin alaıyq. Ol belgili bir ujymnyń turaqty shtatynda turmaıtyn erkin qyzmetker. Soǵan sáıkes óz jumys tártibin ózi belgileıdi. Frılanser tipti basqa elde jumys isteıtin kompanııalardyń da tapsyrystaryn oryndaı beredi. Tek qyzmetine suranys bolsyn deńiz.
«Tengrinews.kz» taratqan habarǵa qaraǵanda, Qazaqstanda mundaı qyzmetkerler sany artyp, 2016 jyly 215 myńǵa jetken. Al osyndaı kásip túri osydan 10-15 jyl buryn bizde múlde tirkelmegen edi.
Osyǵan qaraǵanda búgingi boljam – erteńgi aqıqat. Aldaǵy ýaqytta jańa mamandyqtar men kásip túrleriniń arta beretindigine daý bolmasa kerek.
Suńǵat ÁLIPBAI, «Egemen Qazaqstan»