Dáýirbek Jaqsylyqqyzy oblys ortalyǵyndaǵy Oqýshylar saraıynda «Syrmaq» atalatyn ulttyq qolóner úıirmesin basqarady. Balalardyń sanasyna ulttyq murany jańǵyrtý arqyly oı salady.
Kıiz uǵymy arhaızmge aınalyp bara jatqandaı edi. Dáýirbek sekildi qolónershiler qazir kıizden, júnnen túrli buıymdar jasap, qaıta jańǵyrtýda.
Jahandaný zamanynda urpaqtarymyz halqynyń rýhanı-mádenı muralar sabaqtastyǵyn bilýi qajet. Saraıdaǵy basqa da úıirmelerge 3 myńdaı oqýshy keledi eken. Shyǵarmashylyqpen aınalysýlaryna jaqsy jaǵdaı jasalǵan. Aıpaqshy, opera ánshisi Marııa Mýdrıak, ánshiler Janar Doǵalova, Rınat Malsagov, Ásel Muqataevalar da osy saraıdaǵy án stýdııasynan óner álemine qanat qaqqany belgili.
– Maqsat – balalarǵa halqymyzdyń árqaısysynyń ǵasyrlyq tarıhy bar qolóner túrlerin úıretip, oıý-órnek arqyly oı salý. Mán-maǵynasyn túsindiremin. Sodan baryp ulttyq qolónerge degen erekshe qyzyǵýshylyq, súıispenshilikteri oıanady, – deıdi Dáýirbek muǵalıma. Úıirmege kelýshi ul-qyzdarymyz shı toqý, shı oraý, jún tútý, ıirý, quraq quraý, keste tigý, oıý-órnekti oıý tásilderi jáne alasha toqýdyń barlyq qyr-syryn úırenýde.
Sómke, shashqystyrǵysh, áshekeı buıymdaryn, aıaqqa ilip alar súıretpeler tigedi. Balalar jasaǵan buıymdardyń «Syrmaq» úıirmesinde erekshe qory jınaqtalǵan. Dáýirhan muǵalıma shıdi kúz aılarynda daladan ózi býyp, jınap ákeledi. Al kıiz basýǵa júndi ata-analar ózderi jetkizip beredi. Mysaly, Máskeýde ótken «Detstvo bez granıs» atty halyqaralyq balalar shyǵarmashylyǵy kórmesine qatysqan Áıgerim Qýannyń kıizden jasaǵan jumystary júlde aldy. Ámına Isabekova, Merýert Smaǵulova, Dalııa Madıarova, Janar Qulmaǵambet, Qaıdar Saıajandar – bolashaq qolónershi, sýretshiler. Olar «Syrmaq» úırimesinen úırengenderin joǵary oqý oryndaryna túsken soń da jalǵastyrmaqshy.
Farıda BYQAI, «Egemen Qazaqstan»
PAVLODAR
Sýretti túsirgen Ásem Aıyp