Bıyl – qazaqtyń kómekeı áýlıesi Buqar jyraý Qalqamanulynyń 350 jyldyq mereıtoıy. Qazirgi tańda aıtýly dataǵa daıyndyq jan-jaqty júrgizilýde. Ańyz tulǵanyń toıy aldymyzdaǵy tamyz aıynda ótedi dep josparlanǵan.
Taıaýda jyraýdyń aty berilgen aýdannyń ortalyǵy Botaqara kentinde mereıtoı sharalaryn uıymdastyrý jónindegi komıssııanyń otyrysy ótip, onda birqatar máseleler talqylandy. Atap aıtqanda, komıssııa músheleri mereıtoıdyń tańba belgisin tańdady. Sarapqa túsken úsh nusqanyń ishinen jergilikti óner mektebiniń oqytýshysy Amantaı Ákishevtiń oryndaýyndaǵy jumys mamandar kóńilinen shyǵyp, mereıtoı logotıpi retinde maquldandy.
Avtor óziniń jumysynda Buqar jyraýdyń sýretin salyp, janyna «Rýhanı jańǵyrý» baǵdarlamasynyń emblemasyn keskindegen. Sondaı-aq logotıpte Táýke hannyń kezindegi qazaqtyń «Jeti jarǵy» Zańynyń sımvoldyq belgisi retinde jeti tańba da úılesimdi kórinis tapqan.
Aıta ketý kerek, atalǵan emblema L.N.Gýmılev atyndaǵy EUÝ-diń professory, belgili tarıhshy Jambyl Artyqbaevtyń da oń baǵasyn alypty.
Sonymen qatar atalǵan komıssııa otyrysynda mereıtoı ótkizýge demeýshiler tartý, jyraýdyń ómiri men halqyna jasaǵan qyzmeti týraly derekti fılm men qysqa metrajdy beınerolıkter túsirý, baspa jáne kádesyı ónimderin jasap shyǵarý sııaqty alýan túrli sharýalar jaıy pysyqtaldy.
Buqar jyraý Qalqamanulynyń 350 jyldyq mereıtoıy Botaqara kentinde ótedi. Buqar jyraý aýdanynyń ákimdigi mereıtoı qarsańynda aýdan ortalyǵyn abattandyryp, joldardy jóndeýdi qolǵa almaqshy.
Qaırat ÁBILDA, «Egemen Qazaqstan»
Qaraǵandy oblysy