«Qazaqstan ınjınırıng» ulttyq kompanııasy» AQ óziniń enshiles kásiporny «Semeı ınjınırng» AQ-qa shamamen 2 mlrd. teńgege ınvestısııa saldy. Bul qarajat qolda bar óndiris alańdaryn qaıta jóndeý men qazirgi zamanǵy jabdyqtardy ornata otyryp óndiristi jańǵyrtýǵa baǵyttalmaq.
Atalǵan sharalar ımportttyq qurastyrý buıymdaryna degen táýeldilikti 50 paıyzǵa deıin tómendetý men zaýyttan shyǵatyn ónimderdiń qunyn aıtarlyqtaı azaıtýǵa ári qazaqstandyq mazmunnyń úlesin 80 paıyzǵa deıin arttyrýǵa múmkindik beredi eken. Sonymen qatar «Qazaqstan ınjınırıng » AQ prezıdenti Bolat Smaǵulov eki júzden astam joǵary bilikti mamandardy jumyspen qamtýǵa jaǵdaı týatyndyǵyn aıtady.
Zaýyt aǵymdaǵy jyldyń mamyr aıyna deıin daǵdarys saldaryn sezinip, kásiporynnyń bıýdjet jáne jeke uıymdar, sonymen qatar jumysshylar aldynda eńbekaqy tólemi boıynsha bereshegi bolǵan. Búgingi tańda Qorǵanys mınıstrliginiń, «Samuryq- Qazyna» UÁQ» AQ pen «Qazaqstan ınjınırıng» UK» AQ-tyń belsendi qoldaýynyń arqasynda qarjylyq problemalar óz sheshimin tapqan. Budan ári Ýkraına men Reseıdiń óndirýshi zaýyttarymen qosalqy bólshekterdi, jınaqtamalar men jabdyqtardy jetkizý boıynsha jańa kelisim-sharttar jasalýda. Qazirdiń ózinde aýyr bronetank tehnıkalaryn kúrdeli jóndeý jónindegi tehnologııalyq jelilerdiń alǵashqysy jetkizilý ústinde. Kelesi jeliler bıylǵy jyldyń jeltoqsanynda júzege asyrylatyn bolsa, bul óz kezeginde tek jóndeý ǵana emes, sol sııaqty bronetank tehnıkalaryn jańǵyrtý bolyp tabylady.
Ábdirahman QYDYRBEK.