Seısenbi kúni Almatyda Qazaqstan quramasyn qysqy Olımpıada oıyndaryna shyǵaryp salý rásimi ótti. Ońtústik Koreıanyń Pxenchxan qalasynda 9-25 aqpan aralyǵynda XXIII qysqy Olımpııa oıyndarynyń jalaýy jelbireıtini aıan. Dúbirli saıysqa oraı, seısenbi kúni ońtústik shaharda Búkiálemdik boks akademııasynda UOK, Mádenıet jáne sport mınıstrligi men quzyrly mekemelerdiń qatysýymen sportshylarymyzdy resmı túrde shyǵaryp salý rásimi ótti.
Qazirgi tańda Qazaqstan sportshylary qysqy sporttyń birneshe túrinen 49 lısenzııa utyp aldy. Olardyń qatarynda medalǵa degen úmitkerler de az emes. Elsııar Qanaǵatovtyń aıtýynsha, olar frıstaılshylar Dmıtrıı Reıxerd, Iýlııa Galysheva, Janbota Aldabergenova, mánerlep syrǵanaýshy Denıs Ten, shańǵyshy Alekseı Poltoranın syndy sańlaqtar.
– Sportshylardyń daıyndyǵy oıdaǵydaı. UOK, federasııalardyń jáne MSM tarapynan qoldaý kórsetilýde. Birneshe kúnde lısenzııalarymyzdyń sany anyq belgili bolady. Sportshylarymyzǵa jeńis tileımiz, – dedi Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov.
Sondaı-aq komıtet tóraǵasy Olımpıada jeńimpazy men júldegerlerine memleket tarapynan syıaqy beriletinin aıtty. «Olımpıada chempıony atanǵan sportshy men onyń jattyqtyrýshysyna memleket 250 myń AQSh dollary kóleminde syıaqy taǵaıyndaǵan. Kúmis medal alǵan sportshyǵa 150 myń, al qolaǵa qol jetkizgen sportshyǵa 75 myń AQSh dollary beriledi. Sonymen qatar úzdik altylyqqa engen sportshyǵa da qarjylaı syıaqy qarastyrylǵan», dedi ol.
Al Pxenchxan qalasyndaǵy qysqy Olımpıada oıyndary eki klasterde ornalasqan 12 sporttyq nysanda ótkiziledi. Pxenchxan taýly klasterinde shańǵy sportynan jarystar ótse, jaǵajaıdaǵy Kannyń klasterinde konkı sportynyń sheberleri ózara myqtyny anyqtaıtyn bolady. Qazaqstan sportshylary Ońtústik Koreıaǵa birinshi aqpannan bastap attana bastaıdy.
– Osy tartysty dodaǵa daıyndyq qarqyndy túrde ótýde. О́zimdi jaqsy jaǵymnan kórsetip, bir nátıjege qol jetkizsem deımin. Bizdiń sport túrinen qazir 3 lısenzııa bar. Menen bólek alǵashqy ret Olımpıadada Aqmarjan Qalmurzaeva men Marjan Aqjigit óner kórsetedi. Tórtinshi lısenzııany Jibek Arapbaeva jeńip alady dep oılaımyz. Bul men úshin ekinshi Olımpıada. Qobaljyp júrmin, óıtkeni maǵan senim artýshylar kóp, 2014 jyly alǵash barǵanymda qazirgideı jaýapkershilik bolmaǵan edi, – dedi BAQ ókilderine bergen suhbatynda frıstaıl-akrobatshy Janbota Aldabergenova. Saltanatty shara barysynda UOK prezıdenti Tımýr Qulybaev pen Mádenıet jáne sport vıse-mınıstri Sáken Musaıbekov sportshylarymyzǵa jeńis tilep, attandyrdy. El namysyn qorǵaıtyn sportshylar óz alǵystaryn bildirip, el úmitin aqtaýǵa tyrysamyz desti.
Olımpıada aýylynda elimizdiń týy 7 aqpan kúni kóteriledi. Aıta keteıik, Phenchhandaǵy qysqy Olımpıada oıyndary aqpannyń 9-y men 25-i aralyǵynda ótedi. Ashylý saltanatynda elimizdiń Kók týyn short-trekshi Abzal Ájiǵalıev ustap shyǵady.
Aınash ESALI, «Egemen Qazaqstan»
ALMATY