Quttyqtaý jedelhattaryn joldady

Memleket basshysy Nursultan Nazarbaev Fran­sııada aýyr atletıkadan ótken álem chem­pıo­na­tynda tamasha jeńiske qol jetkizgen qazaq­stan­dyq sportshy Zýlfııa Chınshanloǵa quttyqtaý jedelhatyn joldady, dep habarlady Qazaqstan Respýblıkasy Prezıdentiniń baspasóz qyzmeti. «Fransııada aýyr atletıkadan ótken álem chempıonatynda qol jetkizgen tamasha jeńisińizben shyn júrekten quttyqtaımyn! Jeńistiń joly ońaı bolmasa da, siz qazaqstandyqtardyń úmitin aqtadyń­yz, bizdiń quramaǵa alǵashqy altyn medaldy alyp bere otyryp, álem rekordyn jańarttyńyz. Bul sizdiń kásibı sheberligińiz ben jeńiske degen aıryqsha erik-jigerińizdiń nátıjesi ekeni sózsiz.  Sizdiń jetistigińiz Táýelsizdigimizdiń 20 jylyndaǵy Qazaqstannyń tolaıym tabystaryna qosylǵan qomaqty úles boldy ári elimizde aýyr atletıkanyń damýyna jaqsy serpin berdi. Altyn medaldy ıelenip qana qoımaı, siz, sport­tyq kásibı ómirińizge  jańa da jarqyn jol ashtyńyz. Aldaǵy ýaqytta da osyndaı jeńister bıiginen kórine beretinińizge senemin. Sizge budan da zor sporttyq tabystar men izgi jaqsylyqtar tileımin!», – delingen quttyqtaý jedelhatynda. *  *  * Memleket basshysy Nursultan Nazarbaev Fransııada aýyr atletıkadan ótken álem chempıo­na­tynda tamasha jeńiske qol jetkizgen qazaq­standyq sportshy Ilıa Ilınge quttyqtaý je­del­hatyn joldady. «Siz óz jeńimpazdaryn, týǵan elin maqtan tutatyn mıllıondaǵan otandastarymyzdyń úmitin kezekti ret aqtadyńyz. Qazaqstannyń sport derjavasy retindegi mártebesi taǵy bir ret dáleldenip, bedeldi álemdik básekede týymyz kókte jelbiredi, ánuranymyz shyrqaldy. Sizdiń jeńisińiz búkil qazaqstandyqtarǵa Táýelsizdik mereıtoıy qarsańyndaǵy tamasha tartý boldy. Jeńiske degen sizdiń erik-jigerińiz, qaısar rýhyńyz ben qajyr-qaıratyńyz, sheberligińiz ben tabandylyǵyńyz barsha qazaqstandyq sportshylarǵa úlgi-ónege bolady dep senemin. Sportta jańa bıikterge jete berýińizge tilektespin!», – delingen quttyqtaý jedelhatynda.