Keıde bir sátti kúnge kez bolasyń. Ondaıda bári ózdiginen oryndalyp, op-ońaı oraılasyp jatqandaı kórinedi.
Búgin, mine, astanalyq dosym «Nurly jol» vokzalynan qushaq jaıa qarsy aldy. Qonaq úıge ornalasyp, tańǵy shaıdy ishýge otyrǵanymyzda baspadaǵy redaktorym telefon shalyp, jańa kitabymnyń súıinshi danasy kelgenin aıtyp jatty.
Sodan soń ony kórip, qýanyp turǵanymda bas esepshi tıisti qaǵazdarǵa qol qoıyp, qalamaqymdy ala ketýimdi ótindi.
Qyzyq. Baspadan shyǵa bere áriptesterim habarlasyp, Astanadaǵy «Almaty» kafesine shaqyrdy.
Al áıtpese...
Tek álgi kafege taksıletip jetip, áriptesterime bir-birden qoltańba jazyp bermek bolǵan kitaptarymdy qoltyǵyma qysyp shyǵa bergenimde... jazataıym jerge túsirip alǵanym.
Bir tańǵalarlyǵy, bireý qolymdy ádeıi qaǵyp jibergendeı jap-jańa kitaptar jan-jaqqa shashylyp ketti.
Jer laısań edi. Áp-sátte adam qaraǵysyz bolǵan túrin kórip yzalanǵanym sondaı, neshe jyldan beri kóz maıymdy taýysyp jazǵan eńbegimdi shirenip turyp teýip jibergim keldi.
Tap sol sátte:
– О́ı!.. – dedi meniń aıaǵymnyń kóterile bergenin baıqap qalǵan dosym shyj-byj bolyp. – Jyndysyń ba, nemene?! Bul – jaqsy yrym ǵoı! Baıaǵyda bizdiń babalarymyz dúnıege jańa kelgen sábıdiń ózin jerge bir aýnatyp alady eken. Al sen bolsań... Qara jerden qasıetti ne bar deısiń, dosym-aý! Sonda baryp esimdi jıdym. Bir kúndik sáttiliktiń ózi pende shirkindi táýbesinen jańyldyryp jibergenin uqtym.
Rasynda da, qara jerden qasıetti ne bar?!.
Ǵaryshqa ushqan jandardyń ózi de osynda qaıtyp oralýǵa asyǵady emes pe.
Nurǵalı ORAZ, «Egemen Qazaqstan»