Tatý kórshilestiktiń tartymdy kórinisi

Qarashanyń 21-i kúni elimizdiń Syrtqy ister mınıstri Erjan Qazyhanov Reseı Federasııasyna resmı saparmen bardy. Kúni keshe Elbasy Nursultan Nazarbaevtyń Reseı astanasyna jol tartyp, Joǵary Eýrazııalyq ekonomıkalyq keńestiń 1-shi oty­rysyna jáne Keden odaǵyna mú­she memleketter basshylarynyń kezdesýine qatysýy eki el ara­syn­daǵy qarym-qatynastardyń qanshalyqty strategııalyq mań­y­zy barlyǵyn taǵy da kórsetkeni aıqyn. Jalpy, álemdegi qaı memleketpen de jaqsy baılanys or­na­tý qajet-aq, al onyń ishinde ja­qyn kórshińmen aradaǵy ba­rys-kelistiń jaqsarýy eki jaqty paıdaǵa keneltetini kúmánsiz. Sol saparda kópten kópshiliktiń oı­ynda júrgen Keden odaǵy aıa­syn­da ár eldiń daýys berý quqy­ǵy ártúrli bolýy tóńiregindegi túıtkil sheshildi. Osyǵan deıin daýystyń 57 paıyzy Reseıge tıesili bolsa, Qazaqstan men Belarýske 21,5 paıyzdan keletin edi. Al Elbasy usynysymen keleshekte Birtutas ekonomıkalyq keńis­tiktegi barlyq sheshimder konsensýspen, ıaǵnı barlyq tarap tolyq kelisken jaǵdaıda ǵana qabyl­da­natyn bolyp sheshimin tapty. Erjan Qazyhanov óz jumy­syn keshe tańerteńgilik «Belgisiz soldat» eskertkishine gúl shoǵyn qoıýdan bastap, munan soń Reseı Federasııasy Syrtqy ister mı­nıstrliginiń jekejaıynda (osobnıak) reseılik áriptesi Sergeı Lavrovpen kezdesti. Onyń bary­syn­da eki el arasyndaǵy san sa­la­daǵy ústi-ústine damyp otyr­ǵan búgingi tynys-tirshilikke qo­sa, saıası, saýda-ekonomıkalyq, má­denı-gýmanıtarlyq sala­lar­da­ǵy baılanystar barysy da keńi­nen áńgimelendi. Reseılik mınıstr: «Sizdiń saparyńyz tarıhı kezeńde ótip otyr. Meniń oıym­sha, memleket basshylarynyń kez­desýinde qol jetken nátı­je­ler ekijaqty baılanystardy ıntegrasııalaý turǵysynan bizdi odan da qarqyndy jumys isteýge shaqyrady», dedi. E.Qazyhanov óz sózinde osy­dan úsh kún buryn ǵana mańyzdy tarıhı qujattarǵa – Eýrazııalyq eko­nomıkalyq ıntegrasııa jó­nin­degi deklarasııaǵa, Eýrazııalyq ekonomıkalyq komıssııanyń ke­li­sim-shartyna qol qoıylǵanyn atap kórsetti. Biz Reseımen ara­daǵy qarym qatynastarymyzǵa joǵary mán beremiz jáne sizdiń eldegi saılaýǵa qatysty «Edınaıa Rossııanyń» jeńiske jetýine tilektespiz. Bizdiń elimiz de kezekten tys saılaý ótkizýge daıyn­dyq ústinde, dedi elimiz syrtqy saıa­sat vedomstvosynyń basshysy. Kezdesý sońynda áriptester mınıstrlikter arasyndaǵy 2012 jylǵa arnalǵan Qazaqstan Res­pýb­lıkasy Syrtqy ister mınıstrligi men Reseı Federasııasy Syrtqy ister mınıstrliginiń yntymaqtastyq jónindegi is-sharalar josparyna qol qoıǵan soń, jýrnalıstermen júzdesip, baspasóz máslıhatyn ótkizdi. S.Lavrov óz sózinde áriptesi­men eki arada kóterilgen máse­le­lerge toqtalyp, olardyń ishinde eń bastysy, árıne, memleket bas­shylarynyń ótken jolǵy úsh­jaqty kezdesýinde qabyldanǵan mańyzdy tarıhı qujattar ekenin kóldeneń tartty. Aradaǵy eko­no­mıkalyq ıntegrasııanyń quqyq­tyq negizi qalandy, endi biz osy baılanystardyń jańa joǵary deńgeıge kóteriletinine senimdimiz. Biz sondaı-aq 2011-2012 jyl­­darǵa arnalǵan is-sharalar josparynyń atqarylýyn da jan-jaqty qarastyrdyq. Atom ener­gııasyn beıbit maqsatqa paıdalaný, ǵarysh, energetıka sala­syn­daǵy áriptestik jáne jalpy alǵanda saýda-ekonomıkalyq qa­ty­nastarymyzdy damyta túsý syn­dy san salany qamtyǵan syn­darly kezdesý ótkizdik. Sonymen birge, bizderdiń halyqaralyq uı­ymdar boıynsha, atap aıtqanda, ShYU, TMD, UQShU, AО́SShK syn­dy uıymdardaǵy jumysta­ry­myzdy úılestirý tóńiregindegi qadamdarymyzdyń jaıyn aqyl­das­tyq. О́ıtkeni, lańkestiktiń al­dyn alý, esirtkimen kúres máse­lelerinde bul yqpaldastyq óte qajet. Bizdiń nazarymyzdan Aýǵan­­stan, arab álemi men Sol­tústik Afrıka problemalary da tys qalǵan joq, dedi reseılik mınıstr. Munan soń Reseıdiń bas dıp­lomaty aldaǵy jyly bizdiń elderimiz arasynda dıplomatııalyq qa­tynastar ornaýynyń jáne eki eldiń Máńgilik dostyq týraly deklarasııa qabyldaýynyń 20 jyldyǵy, sondyqtan, osy aı­tý­ly datalardy laıyqty qarsy alý jaıyn da aqyldastyq, dedi. Reseı bizdiń senimdi árip­te­si­miz, ári jaqyn kórshimiz, reseılik áriptesim aıtqandaı, kezdesý ba­rysynda birtalaı máseleler tal­qylandy jáne ol óte paıdaly da mańyzdy boldy, dep bastady só­zin qazaqstandyq mınıstr. О́z­de­rińiz bilesizder, osydan bir jyl buryn bizdiń memleketterimizdiń basshylary birlesken málimdeme jasap, eki el arasyndaǵy barlyq salany qamtıtyn, birlese atqa­ratyn isterdiń josparyn bekitken bolatyn. Búgin arada jyl ótkende biz sol jumystardyń at­qarylýyna monıtorıng júrgiz­dik. Jáne jumystardyń tıimdi júrgizilgenin atap óttik. Búgin ózderińizdiń kóz aldaryńyzda al­daǵy jylǵa arnalǵan is-josparǵa qol qoıdyq. E.Qazyhanov memleket basshylarynyń úsh kún bu­ryn qol qoıǵan qujattarynyń tarıhı mańyzyna da toqtaldy. Halyqaralyq uıymdar boı­yn­sha reseılik áriptesi aıtqan oı­larǵa qosylyp, bizdiń elimiz­diń aldaǵy jyly UQShU-ǵa tór­aǵalyq atqaratynyn jýrnalıster qaperine salyp ótti. Bizdiń osy jolǵy kezdesýimiz aldaǵy yq­paldastyǵymyzǵa oń áserin tı­gizetinine bek senimdimin, ári eki aradaǵy tatý, utymdy kór­shiligimizdi nyǵaıta túsedi dep oılaımyn, degen ol aldaǵy jyly atalyp ótetin, áriptesi joǵaryda aıtqan 20 jyldyqtyń joǵary deńgeıde bolatynyna esh kúmáni joq ekenin bildirdi. Tústen keıin E.Qazyhanov ITAR-TASS agenttiginiń májilis zalynda Djonatan Aıtkenniń «Qa­zaqstan. Táýelsizdikke 20 jyl: tosyn syılar men stereotıpter» atty jańa eńbeginiń tu­saý­keserine qatysyp, sóz sóıledi. Anar TО́LEÝHANQYZY, «Egemen Qazaqstan» – Máskeýden.