Memleket basshysy Nursultan Nazarbaev «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda jemqorlyqpen kúres jáne zań ústemdigine erekshe toqtaldy.
Onyń ózindik máni de bar. О́ıtkeni elde zań ústemdigi ornamasa ádildiktiń aýyly alys ketedi. Al onyń saldary qolǵa alǵan isterdiń oıdaǵydaı atqarylýyna, eldiń damýyna tusaý salady.
Mine, sondyqtan da bizdiń elde zań buzýshylyqpen, sybaılas jemqorlyqpen kúres jalǵasa beredi. О́ıtkeni qazynanyń qarjysyna sýyq qolyn suqqysy keletin teris pıǵyldy joǵary laýazymdy sheneýnikter az emes. Olardy tártipke shaqyryp, qoldaryn qaǵyp otyrmasa eldiń damýyna orasan qaýip tónedi. Bul tórtinshi ónerkásiptik jaǵdaıyndaǵy damýdyń jańa múmkindikterin júzege asyrýǵa da kedergi keltiredi. Demek, jemqorlyqty tyıý men zań ústemdigin ornatý arqyly Elbasy aıtqandaı, memlekettik organdardaǵy prosesterdi, sonyń ishinde olardyń halyqpen jáne bıznespen qarym-qatynasyn sıfrlandyrý asa mańyzdy. Al sandyq tehnologııalardyń ıgiligin aldymen halyq kórýi úshin, onyń sony jańalyqtary halyqqa qyzmet kórsetý barysynda iske asady. Bul rette Qazaqstan 2025 jyly sandyq tehnologııalar boıynsha básekege qabilettilikti anyqtaıtyn álemdik reıtıngte 30-orynnan kórinýi tıis. Elimizde sandyq tehnologııalardy engizý jolynda energetıka men shıkizat, aýyl sharýashylyǵy, ónerkásip, IT, logıstıka syndy 9 salaǵa basymdyq berilip otyr. Demek, Prezıdent aıtqandaı, sıfrlandyrý – bul tek nátıje emes, bul Qazaqstannyń jetistikke jetýdegi túpkilikti basymdyǵy. Osy arqyly barlyq salada básekelestik artady.
Mine, osy kezde Qazaqstannyń zańnamasy kásipkerlik bastamalardy yntalandyryp, ǵylymı-zertteýlerdi, ázirlemeler men jańa tehnologııalardy engizýdi qoldaýy tıis. Bul oraıda azamattardyń konstıtýsııalyq quqyqtaryna kepildikti nyǵaıtý, quqyq jáne zań ústemdigin qamtamasyz etý, quqyq qorǵaý qyzmetin izgilendirý jumystary bir sátte baıaýlamaýy qajet. О́ıtkeni Elbasy aıtqan bul baǵytta damý úshin zańdarymyz da jan-jaqty jetilgen jáne soǵan saı onyń oryndalýy, ıaǵnı iske asýy tıimdi bolýy kerek. Árıne, bul jaǵynan quqyq qorǵaý organdarymyz kende qalyp jatqan joq. Basqa zańdardy bylaı qoıǵanda, tórt birdeı jańartylǵan kodeks ómirge kelip, izgilendirý isine yqpalyn tıgizip jatyr. Zańnamaǵa qylmystyq prosestegi azamattardyń quqyqtaryn qorǵaý isin kúsheıtýdi, onyń ásire qatańdyǵyn báseńdetýdi kózdeıtin normalar engizildi.
Demek, basqa da izgilikti zańdar sekildi Qylmystyq, Qylmystyq-prosestik, Qylmystyq-atqarý jáne Ákimshilik quqyq buzýshylyqtar týraly kodeksterdi zaman talabynan týyndaǵan zańdar dep aıtýǵa bolady. Bul jóninde Elbasy: «Sottar qyzmetiniń zańnamalyq jáne is júrgizý normalaryn júıeli túrde jetildirý mańyzdy. Jańa qylmystyq, qylmystyq-is júrgizý, qylmystyq-atqarýshylyq jáne ákimshilik quqyq buzýshylyq týraly kodeksteri uzaq ári tyńǵylyqty daıyndaldy, ony barlyǵy, men de qaradym. Onda sottardyń jańa quzyreti, sonyń ishinde sot júrgizýdiń jeńildetilgen jańa tártibi qarastyrylǵan. Sot baqylaýy men sot tekserýi barysyndaǵy sýdıalar ókildikteriniń aıasy keńeıýde. Árıne, izgilendirý júrip jatyr, biraq ol maqsat emes, eń bastysy biz bosańsyp ketpeýimiz kerek. Tııanaqty qaraý kerek. Bul kodeksterdiń júzege asýy qylmystyq sot tóreliginiń sapasy men jedeldigin arttyrýǵa jańa múmkindikter ashady», – degen bolatyn.
Endeshe tórtinshi ónerkásiptik jaǵdaıyndaǵy damýdyń jańa múmkindikterin júzege asyrýda árqashan zań ústemdigi joǵary turýy qajet. Al zań ústemdigi degenimiz ne? Ony elimizdiń kez kelgen azamaty jaqsy bilýi tıis. Ol – quqyqtyq zańdylyqty, adamnyń quqyqtary men bostandyqtaryn memlekette eń qymbat qazyna dep bilý. Barlyq jaqsylyq adamnyń baqytty bolýy úshin jasalynýy tıis. Osylaısha quqyqtyq, demokratııalyq, zaıyrly jáne áleýmettik memleket qurý úshin biz zańdylyqty, zańǵa baǵynýdy eń joǵary turǵan jáne múltiksiz oryndaıtyn mindet dep qabyldaýymyz kerek.
Aleksandr TASBOLAT, «Egemen Qazaqstan»