Reseı qazaǵy Arman Dáýletııarovqa «Arman» degen esim tekke qoıylmaǵan. Aýzyn ashsa aq júregi kórinetin qandasymyzdyń dúısenbi kúni Almatyda «Máskeýlik Shyńǵyshannyń tarıhy» atty avtorlyq kitabynyń tusaýy kesildi. Armannyń armandar týraly jáne oǵan qalaı jetýdiń joldary týraly kitaby birden qazaqstandyq BAQ ókilderiniń nazaryn aýdaryp otyr.
Bul kitap Máskeýdegi shoý-bıznesti baǵyndyrǵysy kelgen qarapaıym qazaq jigitiniń tarıhy men Reseı shoý-bıznesiniń buralań joldary jaıly baıandaıdy. Qazir Arman Dáýletııarov Mýz-TV telearnasynyń mýzykalyq dırektory, Reseı jáne Qazaqstan mádenı-iskerlik yntymaqtastyǵy halyqaralyq ortalyǵynyń prezıdenti. О́tken jyly ol Qazaqstan Respýblıkasy Prezıdentiniń Jarlyǵymen «Qurmet» ordenimen marapattalǵanyn eske sala ketýge bolady. Al joǵarydaǵy kitap Reseıdegi tanymal prodıýserdiń tyrnaqaldy týyndysy.
– Bul týyndy meniń dostarym men janyma jaqyn jandarǵa arnaǵan syılyǵym. Men ony jazýǵa uzaq ázirlendim, mine, armanym oryndaldy. Sizder kitaptan Murat Nasyrov pen Baǵlan Sádýaqasov syndy tanymal jandardyń óner jolyndaǵy qıyndyqtary jáne olardyń jeke tulǵa retinde qalyptasý tarıhyn bile alasyzdar. Bul ánshilerdiń de aramyzdan ketkenine bes jyldyń júzi bolypty. Olar meniń eń jaqyn dostarym bolatyn. Biz Máskeýge birge attandyq, shoý-bıznes baspaldaǵyna birge qadam basqan edik, – deıdi Arman.
Reseıdegi «AST» sııaqty bedeldi baspahanamen birlese otyryp shyqqan kitap jeńil oqylady, shynaıy oqıǵalarymen qundy. Kitapta prodıýserler men ártister arasyndaǵy kúrdeli qarym-qatynas, mahabbat, otbasy, dostyq pen ómirdegi ózge de qundylyqtar jaqsy ashyp kórsetilgen.
Avtor óziniń jeke ómirine qatysty jáıtterdi mysalǵa ala otyryp, adam tabys pen mahabbatqa jetý úshin jan-dúnıesiniń náziktigin joǵaltyp almaý qajettigin aıtady. Adamı qasıetter kisiniń kásibine de ultyna da baǵynbaıdy, deıdi ol. Shoý-bıznes jolyndaǵy jigit sóıtip tuńǵysh ret óz tarıhy arqyly adam ózin ózi qalaı tárbıeleýge bolatyndyǵy jaıly syr shertedi. Kitap prodıýserlik qyzmettiń qyr-syryn meńgergisi keletinder úshin ǵana emes, ómirde baqyt pen tabysqa jetýdiń qupııasyn bilgisi keletinder úshin de qundy.
Sonymen reseılik qandasymyzdyń jýrnalıstermen emen-jarqyn jaǵdaıda ótken kitap tusaýkeseri tamasha suhbat alańyna aınaldy. Baspasóz máslıhatyna ánshi-sazger Batyrhan Shúkenov, belgili mýzykant, prodıýser Baıǵalı Serkebaev qatysyp, kitapta keltirilgen qyzyqty da taǵylymdy oqıǵalar jaıly óz aýyzdarymen baıandap, jýrnalısterdiń saýaldaryna jaýap berdi.
Aınash ESALI.
Almaty.