Ardaqty aqyn Ǵalym Jaılybaıdyń esimi Alash jurtyna jaqsy málim. Ol túgili, qazirgi tańda poezııa tarlanynyń jaýhar jyrlary shet tilderine aýdarylyp, shartarapqa da tanyla bastady. Mine, osyndaı bıik deńgeıge kóterilgen aqynnyń jyr keshin Almaty nemese Astana emes, tipti oblys ortalyǵy Qaraǵandy emes, jer aıaǵy alystaǵy Jezqazǵanda ótkizilýiniń ózindik sebebi boldy. Bul ıgi iske bastamashy bolǵan Arqanyń atymtaı jomarty, ultjandy azamat, oblystyq máslıhattyń depýtaty Bekzat Altynbekov edi. Mesenattyń mereıtoı ıesine jasaǵan tosynsyıy Jezqazǵannyń jyrsúıer qaýymy úshin parasatty poezııanyń aıta júrer aýqymdy merekesine ulasty.
«Jezqazǵan – jeruıyǵym júrektegi...» atty jyr keshi S.Qojamqulov atyndaǵy qazaq mýzykalyq-drama teatrynda ótti. Kesh shymyldyǵyn atalǵan teatrdyń ártisteri pýblısıst aqynnyń «Qara oramal» atty poemasyn ózek etken qoıylymmen túrdi. Aıta ketý kerek, álemniń 13 tiline aýdarylǵan bul týyndy Shvesııada ótken «Open Eurazian-2017» ádebı festıvaliniń «Poezııa» atalymy boıynsha júldegeri bolǵan. Atyshýly «QarLag»-tyń qapasynda týǵan sábılerdi ana qushaǵynan julyp alyp, tor ishine toǵytqan qasiretti jyldardyń sherin uqtyryp, zaryn jetkizgen ártisterdiń sheber oıyny zal toly kórermenniń kózine jas aldyrdy.
Kesh – sahna tórinen oryn alǵan aqyn jáne júrgizýshiniń erkin únqatysýy pishiminde júrgizildi. Suraqtarǵa jaýap bere otyryp, aqyn Ǵalym Jaılybaı búgingi kúnde ózin ǵana emes, qoǵamdy tolǵandyrǵan ózekti máseleler tóńireginde oı tolǵady. Oıǵa alǵan josparlarymen bólisip, jyrlaryn oqydy.
Jezqazǵan qalasynyń ákimi Batyrlan Ahmetov aqyndy mereıtoıymen quttyqtap, ıyǵyna shapan japty, astyna at mingizdi. Budan keıin mereıtoı ıesin quttyqtaýshy qaýym kezek-kezegimen sahnaǵa kóterilip, lebizderin jetkizip, ózderiniń aqjarma tilekterin bildirdi. Olardyń qatarynda Memlekettik qyzmet salasyndaǵy óńirlik habtyń basqarýshy komıtetiniń tóraǵasy Álıhan Baımenov, tanymal telejýrnalıst Nurtileý Imanǵalıuly, aqyn, Qazaqstan Jazýshylar odaǵy Qaraǵandy oblystyq bólimshesiniń tóraǵasy Serik Aqsuńqaruly jáne jergilikti zııaly qaýym ókilderi boldy.
Ǵalym Jaılybaıdyń áýezdi jyrlaryna jazylǵan ánder de keń saraıdyń ishinde qalyqtady. Ásirese, aqynnyń «Esil aǵady» áni kórermen qaýymdy Saryarqanyń maıda salqyn samalyndaı sergitip, syrly sezim qushaǵyna bóledi.
Aqyn jyr keshi bastalmas buryn qaladaǵy №8 mektep-gımnazııanyń ustazdary jáne oqýshylarymen júzdesti. Bilim ordasynda ol óskeleń urpaq ókilderiniń suraqtaryna jaýap berip, óziniń sońǵy kezderi jazylǵan óleńderin oqydy. Odan keıin oqyrmandarmen júzdesý Jezqazǵan qalalyq tarıhı-arheologııalyq murajaıy qabyrǵasynda jalǵasyn tapty. Bul jerde aqynmen birge ere kelgen qonaqtar Jezqazǵan-Ulytaý óńiriniń tarıhynan syr shertetin jádigerlermen jáne qundy derektermen tanysty.
Qaırat ÁBILDA, «Egemen Qazaqstan»
Qaraǵandy oblysy, Jezqazǵan qalasy