«Baldáýren» respýblıkalyq oqý-saýyqtyrý ortalyǵynda «Rýhanı jańǵyrý» baǵdarlamasy aıasynda «Patrıotızm – rýhanı jańǵyrýdyń berik irgetasy» atty II Respýblıkalyq jas patrıottar forýmy bolyp ótti. Onyń jumysyna Qazaqstan patrıottary akademııasynyń músheleri, «Rýhanı jańǵyrý» baǵdarlamasynyń menedjerleri, qaharmandyq is jasaǵan oqýshylar jáne «Men – óz elimniń azamatymyn!» atty respýblıkalyq baıqaýdyń jeńimpazdary qatysty.
Atalǵan sharada qaharmandyǵymen erekshelengen oqýshylardy jáne belgili bir jetistikke qol jetkizgen baldáýrendik jas patrıottardy akademııa músheligine qabyldaý rásimi bolyp ótti. Jalpy sońǵy eki jylda «Baldáýren» respýblıkalyq oqý-saýyqtyrý ortalyǵynda mektep oqýshylaryna patrıottyq tárbıe berýde biraz sharýa atqarylǵan. Úlken izdenisterdiń nátıjesinde qazaqstandyq jas patrıottar akademııasynyń sapyna 1442 oqýshy múshelikke qabyldanypty. Solardyń qatarynda jańadan qabyldanǵan eki oqýshy erekshe ataýǵa turarlyq. Biri Almaty qalasynyń oqýshysy Kondrat Mıl bolsa, ekinshisi Aqmola oblysynyń oqýshysy Uldana Sovet. Sońǵysynyń erlik isiń aıtqanda eriksiz basyńdy ıesiń. Ol órtenip jatqan úıden inisi men sińlisin aman alyp shyqqan. Qazir Uldana Kókshetaý mektepteriniń birinde úshinshi synypta oqıdy.
Múshelikke qabyldanǵandar arasynda, sonymen qatar «Men – óz elimniń azamatymyn!» atty respýblıkalyq baıqaýdyń 25 jeńimpazy da bar. Baıqaýǵa elimizdiń túkpir-túkpirinen 157 mektep oqýshysy óz jumystaryn joldaǵan. Al «Rýhanı jańǵyrý» baǵdarlamasynyń negizgi mindetterin júzege asyrý boıynsha ótkizilgen únqatysý alańyna 500 delegat jınalǵany málim boldy. «Baldáýren» ROSO bas dırektory Muhıtdın Tólepbaı forým qatysýshylaryna arnaǵan sózinde olardyń aldaǵy ýaqytta qazaqstandyq jalpyulttyq qundylyqtarǵa jáne memleket aldyna qoıylǵan mindetterge atsalysatyndaryna senim bildirdi.
«Biz sizderdiń forýmda ınnovasııalyq ıdeıalaryńyzdy qalyptastyrý men usyný boıynsha qundy tájirıbe alatyndaryńyzǵa, eresekterdiń ustanymdaryn estıtinderińizge senimdimiz. Forým jas urpaqtyń patrıottyq tárbıesin damytýǵa, jáne «Rýhanı jańǵyrý» baǵdarlamasynyń negizgi mindetterin júzege asyrýǵa óz úlesin qosatyn delegattardyń suhbat alańyna aınalýy tıis. Osy otyrǵan patrıottardan úlken úmit kútemiz. Endi 15-20 jyldan keıin elge qyzmet jasaıtyn naǵyz patrıottar sizdersizder dep oılaımyn», – dedi M.Tólepbaı. Budan basqa, shara aıasynda Almaty oblysy Jarkent qalasynyń balalary «Týǵan jer» baǵdarlamasy boıynsha ózderiniń jumys tájirıbelerimen bólisti. Odan keıin balalarǵa arnalǵan qazaq estradasynyń ónerpazdarynyń konserti bolyp, ol qatysýshylarǵa kóterińki kóńil-kúı syılady. Jáne de «Qazaq halqynyń ulttyq oıyndary» sporttyq oıyndary da forým baǵdarlamasyna enip, balalardy bir serpiltip tastady. Onyń arty «Qazaq eli osyndaı!» sporttyq fleshmobqa ulasty.
Shara aıasynda «Baqytty bolyp júrgenim – seniń arqań, Uly Otan!» dep atalǵan toptyq jumystar kórsetilip, Qazaqstannyń kórikti jerleri kórinis tapqan pazldar jınaldy. Sondaı-aq patrıottyq tárbıe boıynsha «Innovasııalyq oılar bankin» qurý boıynsha jumystar qorǵaldy. Munyń barlyǵy da balalardyń oıynda jaqsy áserler qaldyryp, olardyń otansúıgish ári baýyrmal bolyp qalyptasýyna ózindik oń áserin bergeni anyq.
Asqar TURAPBAIULY,
«Egemen Qazaqstan»
Aqmola oblysy