Týra on jeti kúnge sozylǵan Phenchhan Olımpıadasy óz məresine jetti. Bıylǵy Olımpııa oıyndary Sochı Olımpıadasynan da joǵary deńgeıde ótti deýge tolyq negiz bar. Oǵan XXIII qysqy Olımpııa oıyndarynyń kórigin qyzdyrýǵa 92 elden 2925 sportshy kelgeni, Sochıdegiden 7 sport saıysy men 15 medal jıyntyǵynyń kóptigi, al jarystar kezinde 20-dan asa Olımpııalyq rekordtyń tirkelgeni tolyq dəlel bola alady. Búginde tarıhtyń qoınaýyna engen bul Aq Olımpıadada aqyrǵy sətine deıin qatysýshy komandalar top basyna talasty.
Sportshylardyń jekeleı rekordynan bólek, norvegııalyq saıypqyrandar Phenchhan Olımpıadasynda medal jıyntyǵy boıynsha da rekord ornatty. 14 altyn, 14 kúmis jáne 11 qola júldege qol jetkizgen Vıkıngter eli jalpy sany 39 medal ıelenip, Vankýver Olımpıadasynda jalpy sany 37 (9-15-13) medal alǵan AQSh-tyń rekordyn jańartty.
Phenchhan Olımpıadasyna qatysqan 2925 sportshynyń 91-i eki jáne odanda kóp medal jınady. Onyń ishinde norvegııalyq shańǵyshy Iohannes Klebo men fransııalyq bıatlonshy Marten Fýrkad úsh ret Olımpıada chempıony atandy. Al taǵy bir norvegııalyq shańǵyshy Marıt Bergen osy Olımpııa oıyndarynda eń kóp medal alǵan sportshy atandy. Bergenniń ózi Norvegııa quramasyna eki altyn, bir kúmis jáne eki qola júlde saldy.
Bıylǵy Olımpıadada 30 eldiń sportshylary júldeger atandy. Bul Sochı Olımpıadasymen salystyrǵanda tórt elge kóp. Sondaı-aq Phenchhan Olımpıadasynda 22 eldiń sportshylary altyn medal jeńip aldy. Sóıtip Sochı Olımpıadasynyń rekordyn qaıtalady. Al medal jıyntyǵy boıynsha jalpykomandalyq esepte Norvegııa quramasy top bastady. Osynaý uly kóshte Qazaqstan sportshylary jalǵyz qola medalmen 28-orynnan kórindi.
Álı BITО́RE,
«Egemen Qazaqstan»