Jarma aýdanynyń ortalyǵy – Qalbataý aýylynda kásipkerlik jáne ónerkásip forýmy ótti. Forým barysynda aýdan kásipkerleri bıznestiń áleýmettik jaýapkershiligi aıasynda jalpy quny 124 mıllıon teńgeni quraıtyn yntymaqtastyq memorandýmyna qol qoıdy.
Bir ǵana «Baqyrshyq» ken orny bul kúni memorandým aıasynda aýdannyń áleýmettik salasyna 102 mıllıon teńge qarjy bólýge daıyn ekendikterin jetkizdi. Saltanatty shara kezinde Jarma aýdanynyń ákimi Nurlan Sydyqov aýdannyń úzdik kásipkerlerin 9 atalym boıynsha marapattap, 100 myń teńgeniń sertıfıkattaryn tabys etti.
«Ekonomıkanyń qozǵaýshy kúshi – ınvestısııa. Byltyr aýdanymyzǵa 65 mıllıard teńge ınvestısııa quıyldy. Bul – oblys kóleminde О́skemen qalasynan keıingi kórsetkish. Investısııa quıýshylardyń deni – ken oryndary. Igerilmeı jatqan «Baqyrshyq» ken ornyna Reseıdiń «Polımetall» kombınaty úlken ınvestısııa salyp, qurylys jumystaryn júrgizdi. «Bóke», «Aqjal» kenishterine de ınvestısııa salynyp, ken baıytý kombınaty boı kóterdi. Qazir Jarma aýdanynyń tórt jaǵynan jol qurylysy bastalyp jatyr. Oblysta balama qýat kózderine arnalǵan 6 joba bolsa, sonyń úsheýi Jarma aýdanynda. Ispan kompanııasy 17 mıllıard teńge qarjyǵa kún elektr stansasyn salýdy josparlap otyr. Barlyq qujat jumystary aıaqtaldy, qurylysty bastaýǵa ruqsat aldy. Búgingi forýmǵa kelsek, mundaı forým jyl saıyn ótkiziledi. Kásipkerlerdi atalymdar boıynsha marapattaımyz. Bıyl memorandým aıasynda aýdanǵa bólinetin qarjy byltyrǵymen salystyrǵanda eki esege ulǵaıdy. Taǵy bir jaǵymdy jańalyq, bıyl «Baqyrshyq» ken orny iske qosylýǵa tıis. Bul aýdan, oblys emes, respýblıka kóleminde mańyzdy oqıǵa retinde qalary sózsiz», deıdi aýdan ákimi.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany