«Jas Otan» jastar qanaty uıymy 1 naýryz – Alǵys kúnine oraı Astana qalasy ákimdigi «Balalar úıi» mekemesiniń tárbıelenýshilerin kınoǵa shaqyrady. Balalar qazaqstandyq rejısser Alen Nııazbekovtyń «Kanıkýly v Taılande» fılimin tamashalady.
Qaıyrymdylyq seans «Kinopark» kınoteatrlar jelisiniń qoldaýymen ótti. Shara arqyly jastar adamdardy bir-birine meıirimdi bolýǵa, qoldan kelgen kómekti aıamaýǵa shaqyrady. Sonymen qatar, 1 naýryz – Alǵys kúni «Nur Otan» partııasynyń mereıtoıymen tuspa-tus keldi. Bıyl Elbasy tóraǵalyq etetin partııa 19 jyldyǵyn toılaıdy. Partııanyń Jastar qanaty qos merekeni balalarǵa syılyq jasap, qýanysh syılaý arqyly atap ótýdi sheshken.
«Osyndaı qaıyrymdylyq aksııalaryn kóbirek ótkizgimiz keledi. Sebebi basqaǵa jaqsylyq jasaý arqyly, ár adam ózin baqyttyraq sezinetinine senimdimin. Jastardy jaqsylyq jasaýǵa, kishige qamqor bolýǵa, qoǵamdaǵy máselelerge beı-jaı qaramaýǵa úıretkimiz keledi. Bul bastama bir kúndik aksııa bolyp qalmaýy kerek, ary qaraı jalǵasyn tabady dep senemiz jáne óz tarapymyzdan uıymdastyryp turýǵa kúsh salamyz», deıdi «Jas Otan» JQ tóraǵasy Danııar Súndetbaev.
Qyzyq qaljyń men kúlkili sátterge toly fılmdi kórgen balalar tamasha kóńil kúımen shyqty. Biri eń qyzyqty sátterdi esine alsa, qalǵandary fılmnen alǵan áserlerimen bólisti.