Alǵys aıtý kúnin óskemendikter bıyl keń aýqymda, birqatar taǵylymdy sharalarmen atap ótti.
Qaladaǵy merekelik sharalar legi О́skemenniń irgesindegi Ahmer aýylyndaǵy Balalar aýylynan bastaldy. Oblys ákiminiń orynbasary Ásem Núsipova men oblystyq bilim basqarmasy basshysynyń mindetin atqarýshy Saırangúl Jumadilova meıirim mekenine arnaıy baryp, ata-ana qamqorlyǵyna zárý búldirshinderdi merekemen quttyqtap, jyly lebizderin jetkizdi. Á.Núsipova mundaǵy tárbıelenýshilerge Sara Alpysqyzynyń quttyqtaýyn oqyp berip, oblystyq bilim basqarmasynyń atynan monoblokty syıǵa tartty. Balalar aýylynyń tárbıelenýshileri de qarap qalmaı «Alǵysym sheksiz, týǵan el» atty konserttik baǵdarlamasyn usyndy. Búginde munda 69 búldirshin tárbıelenip jatqany belgili. «Bizdi esten shyǵarmaı qamqorlyq tanytyp júrgen úlken júrekti azamattarǵa alǵysymyz sheksiz. Kóńili ashyq, darhan minezdi 79 mekeme basshysy bar, olar basqaryp otyrǵan 105 ult pen ulystyń ókilderi jylyna bir ret bizdiń balalardyń esepshottaryna bir aılyq eńbekaqylaryn aýdaryp keledi. Bes jyldyń ishinde balalardyń shotyna 80 mıllıon teńgege jýyq qarajat jınaldy, qazir 26 mıllıon teńge «Turǵyn úı-qurylys jınaq banktegi» shottarynda jatyr, bolashaqta 23 jasqa tolǵanda olar baspanaly bolady», - deıdi Balalar aýylynyń dırektory Aman Islıamov.
Merekeniń ajaryn kirgizgen ıgi sharanyń biri - oblystyq ardagerler keńesiniń uıytqy bolýymen tuńǵysh ret uıymdastyrylǵan «Aq bata – asyl mura» atty baıqaý. Dýaly aýyz qarttardyń óner dodasyna aýdandar men qalalardaǵy irikteý saıysynan irkilmeı ótken 22 batagóı qarııa kelipti. «Sizderdi 1 naýryz - Alǵys aıtý kúnimen shyn júrekten quttyqtaımyn. Bizdiń eń úlken baılyǵymyz – elimizdegi tynyshtyq, turaqtylyq pen bereke-birlik. Búgin tek alǵys aıtatyn kún ǵana emes, tarıhqa kóz júgirtip, elimizge syrttan kóshirilip ákelingen halyqtardyń kórgen qıyndyǵyn, shekken mehnatyn sanamyzda bir jańǵyrtyp, olarǵa bizdiń ata-babalarymyzdyń kórsetken qurmet, jasaǵan qamqorlyqtaryn eske alatyn kún. Búginde bizdiń oblysta 14 Dostyq úıi, 123 etnomádenı birlestik jumys isteıdi. О́ńirimizde 105 ulttyń ókilderi tatý-tátti turmys keshýde. Elbasymyzdyń «Rýhanı jańǵyrý» baǵdarlamasy aıasynda qazir biz jeti úlken baǵytta jumys istep jatyrmyz. Bul baǵdarlama – elimizdi meken etken barlyq etnostardyń mádenıeti men tilderin saqtaýǵa, dástúrlerin jańǵyrtýǵa múmkindik beretin biregeı joba. Búgingi ótkizilip otyrǵan shara - sonyń dáleli», – dedi oblys ákiminiń orynbasary Ásem Núsipova saıystyń ashylý saltanatynda sóılegen quttyqtaý sózinde. Úsh kezeńnen turǵan baıqaý qorytyndysynda bas báıgeni (100 myń teńge) ulandyq Rashıtbek Muhamedjanov aqsaqal ıelense, birinshi oryndy jarmalyq batagóı Murat Jarmuhamet qanjyǵasyna baılady. Eki ekinshi oryndy kókpektilik Shahan Tursynhanov pen semeılik Qaıymhan Beısenbaev, júldeli úsh úshinshi oryndy Abaı aýdanynan kelgen Aqanǵalı Maqaev, aıagózdik Aqash Kóksegenov pen tarbaǵataılyq Serik Beksaıynov ózara bólisti.
Qaladaǵy Dostyq úıi-qoǵamdyq kelisim ortalyǵynda óńirdegi etnomádenı birlestikterdiń uıytqy bolýymen Alǵys aıtý kúnine oraı merekelik shara uıymdastyrylyp, jurt nazaryna konserttik baǵdarlama usynyldy. Shara barysynda qoǵamdyq kelisimdi nyǵaıtýǵa úles qosyp júrgen birqatar azamattarǵa qurmet kórsetilip, alǵys hattar tabystaldy.
Sonymen qatar shahardaǵy «Ana men bala» ortalyǵynda ashyq esik kúni uıymdastyrylyp, bilikti dárigerler bolashaq analarǵa tegin aqyl-keńes berdi. О́skemen qalasynyń ákimi Qýat Tumabaev bul kúni 10 balanyń anasy Kúlııa Kenemoldına men 7 balanyń anasy Olga Raneevany merekemen quttyqtap, «Altyn alqa» belgisin saltanatty túrde tabys etti.
Azamat QASYM,
«Egemen Qazaqstan»
О́SKEMEN