Qyzdaı qosylǵan qosaǵy, kishkentaı shaqalaǵy bar kelininen aıdyń, kúnniń amanynda aıyrylyp, qan jutyp qalǵan azamat osylaı deıdi. Et jaqyndaryn qandyqol qaraqshy qyryp ketken joq, jar degende jalǵyz uly jaıratyp tastaǵan eken.
Bul sumdyq oqıǵa Ońtústik Qazaqstan oblysy Shubarsý aýylynda boldy. Bul aýyl kezinde Shymkent qalasy turǵyndarynyń saıajaıy bolatyn. Sonaý bir tolqynmen О́zbekstannan kelgen aǵaıyn osyndaǵy arzan saıajaılardy satyp alyp, úlken aýylǵa aınaldyryp jibergen edi. Ábdi Qojyqov ta osy toppen О́zbekstannan kóship kelip, bireýden ilgeri, bireýden keıin ómir súrip jatqan. Onyń jalǵyz uly jıyrma segiz jastaǵy Jandarbek keıingi jyldary kúrt ózgeripti. Esirtki tartady-aý dep shamalaıdy ákesi. О́z-ózimen júrgen soń jalǵyz balasyn polısııaǵa qaıdan ustap bersin. Qoıar degen úmiti boldy. Temeki shekken Jandarbek túnde dalaǵa shyǵýǵa qorqady eken. Kúnine namazyn qaza qylmaı oqyp, sosyn uıyqtaı beretin bolǵan.
Qandy oqıǵa bolatyn kúni sebep bolatyndaı urys-keris bolmaǵan. Kelini dári kerek degen soń Ábdi aqsaqal ony dárihanaǵa jiberip, Jandarbekke otyn ákel dep buıyrady. Sóıtse uly dastarhandaǵy pyshaqty ile ketken eken. Ol áıelin qýyp baryp pyshaqqa jyqqan soń, aıqaıdy estip úıden sheshesi atyp shyǵady. Kelini qorqyrap jyǵylyp jatqanyn kórgen ol ulynan qorqyp, keri qashady. Esirtki kózin tumandatqan essiz ul týǵan sheshesin de pyshaqtap tastaıdy. Qandy qyrǵynnyń ústinen túsken ákesine kózi qyzarǵan ul «siz de ólesiz, men de ólemin» dep pyshaǵyn jalańdatyp tura umtylady. Ábdi aqsaqal elirgen balanyń qolyn qaıyryp, pyshaǵyn alady da, aıqaılap kórshisin shaqyrady.
Osylaısha, aınaldyrǵan bes-alty mınýttyń ishinde bir otbasynyń shańyraǵy ortasyna túsken. Kelini alty aı buryn bosanǵan edi. Jetim qalǵan náresteni qyzdyń áke-sheshesi kelip alyp ketipti.
Otbasy bir kúnde oırandalǵan Ábdi Qojyqov balasyn aqtarǵa sóz tappaı otyr. «Júz jylǵa kesilse de ókinbeımin» deıdi. Biraq bir nárseniń baıybyna barǵysy keledi. Ásheıinde momyn balasyna esirtki ákep berip, satyp júrgen kim?! О́ıtkeni esirtkige elikken osy aýyldyń bir turǵyny balasyn pyshaqtap tastaǵan eken. Iаǵnı adamdy aqyl-esten aıyratyn anashany satyp, paıda taýyp júrgen qaskúnemder bar. «Solardy taýyp, jazalasa», deıdi júregi qan jylaǵan beıbaq áke.
Búginde bul máselemen quqyq qorǵaý organdary aınalysyp jatyr.
Baqtııar TAIJAN,
«Egemen Qazaqstan»
Ońtústik Qazaqstan oblysy