«Kásibı áskerılendirilgen avarııalyq-qutqarý qyzmeti» kásipornynyń Mańǵystaý fılıalynda respýblıkalyq BAQ ókilderine arnalǵan presstýr uıymdastyryldy.
Jýrnalıster qaýymyna Mańǵystaý fılıalynyń búgingi qyzmeti tanystyrylyp, qutqarýshylardyń qaýipti de jaýapty jumystarynan jattyǵý dabyldary nazarǵa usynyldy, sondaı-aq, óńirimizdegi jalǵyz áskerılendirilgen kásibı mekemeniń qural-jabdyqtary men arnaıy tehnıkasy tanystyryldy. Jýrnalıster nazaryna ónerkásiptik alpınızm oqý-jattyǵýy naqty túrde usynyldy. Qutqarýshylar bıiktikte zardap shegýshini alyp shyǵyp, alǵashqy kómek kórsetti.
-Zardap shegýshini burǵylaý qurylǵysynan alpınıstik qural-jabdyq arqyly alyp shyǵý – ońaı sharýa emes. Ereje boıynsha is-qımyl 15 mınýtqa sozylady. Eger, kómek ýaqytyly kórsetilmese, zardap shegýshi ólip ketýi múmkin. Dıspetcherden bolǵan oqıǵa týraly aqparatty alǵan soń, birden qajetti qural-saımandardy daıyndaımyz. Jańa ǵana bıiktikte zardap shekken adamdy qutqaryp aldyq, 20 qutqarýshy ónerkásiptik alpınızm boıynsha arnaıy kýrstan ótti, deıdi vzvod komandıri Turaly Kocherbaev.
Odan ári jýrnalıster fılıal bazasyndaǵy qural-saımandar men arnaıy tehnıkamen tanysty jáne oqý zalynda tájirıbeli ınjener Esen Qanaev dáris ótkizdi, tilshiler qutqarýshylardyń qıyn da jaýapty jumysy jaıyndaǵy beınerolıkti tamashalady.
Jýrnalıster fılıal qyzmetkerleriniń bir kúndik jumysymen tanysyp, aldaǵy ýaqytta aqparattyq qoldaý kórsetýge ázir ekendikterin jetkizdi.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy