Almatydaǵy Dostyq úıinde Elbasy Nursultan Nazarbaevtyń «Prezıdenttiń bes áleýmettik bastamasy» atty halyqqa Úndeýin talqylaýǵa arnalǵan Qazaqstan halqy Assambleıasynyń respýblıkalyq keńesi ótti. Is-sharaǵa QHA Tóraǵasynyń orynbasary – Hatshylyq meńgerýshisi Leonıd Prokopenko bastaǵan Assambleıa músheleri men etnomádenı birlestikterdiń jetekshileri, sondaı-aq birqatar zııaly qaýym ókilderi qatysty.
Prezıdent Úndeýinde aıtylǵan bes bastamanyń árbirine jekeleı toqtalǵan Assambleıa ókilderi halyqtyń áleýmettik jaǵdaıyn jaqsartýǵa baǵyttalǵan bul joba der shaǵynda qolǵa alynǵan ıgi qadam dep baǵalady. Bul jumystardy iske asyrýda Qazaqstan halqy Assambleıasy da barynsha kúsh salatyny, ol úshin bastamany halyqqa durys jetkizýdiń mańyzy zor ekeni sóz boldy. Máselen, aldaǵy jaz aılarynan bastap Qazaqstan halqy Assambleıasynyń mýltımedııalyq portaly iske qosylady. Onda túrli etnomádenı ortalyqtardyń jańalyqtary jarııalanyp turmaq. Portal jumysynyń basty baǵytynyń biri Prezıdenttiń bes áleýmettik bastamasyn jastarǵa jetkizýge arnalady.
– Memleket basshysy birinshi kezekte halyqty qoljetimdi baspanamen qamtý máselesine toqtaldy. «7 – 20 – 25» baǵdarlamasy jurtshylyqty baspanamen qamtý jumystaryn ońtaıly sheshýge jol ashatyn bolady. Prezıdent ekinshi bastamasynda stýdent jastarǵa barynsha jaǵdaı jasaý jaıyn negizge alyp, memlekettik grant sanyn taǵy da 20 myńǵa ulǵaıtýdy tapsyrdy. Jastarymyz osyny jaqsy túsinip, jaqsy bilim alyp básekege qabiletti maman bolýǵa talpynýy tıis. Memleketimizdi damytatyn negizgi tetikterdi anyq kórsetip bergen Prezıdent sóziniń qorytyndysynda munyń barlyǵy oıdaǵydaı iske asýy úshin bárinen de birlik pen tatýlyqtyń mańyzdy ekenin aıtty. Osynaý aıqyn maqsattardyń jolynda bárimiz kúsh biriktirip, memleketimizdiń damýyna ózindik úlesimizdi qosýymyz kerek, – dedi QHA Tóraǵasynyń orynbasary L.Prokopenko.
Basqosýda Prezıdent Úndeýinde qamtylǵan shaǵyn nesıelerdiń jalpy somasyn ulǵaıtý jaıy da aıtyldy. Bul bastama azamattardyń kásipkerlikpen aınalysýyna jol ashyp, ekonomıkalyq áleýetimizdiń artýyna serpin beredi degen «Ahyska» túrik etnomádenı ortalyǵy tóraǵasynyń orynbasary ShahIslam Asıev: «Elimizde óz isin dóńgeletemin degen azamattarǵa múmkindik mol. Memleket kásipkerlerdi jan-jaqty qoldap keledi. Elbasy shaǵyn nesıelerdiń jalpy somasyn 62 mıllıard teńgege deıin kóbeıtýdi tapsyrdy. Osy arqyly azamattarymyz óz maqsatyn júzege asyryp, halyqty jumys oryndarymen qamtýǵa, otandyq ónimder sanyn kóbeıtýge óz úlesterin qosa alady» dedi.
«Elimizdiń gúldenýi – árbirimizdiń jaqsy ómir súrýimizdiń kepili» degen assambleıalyqtar, Úndeýde aıqyndalǵan maqsattardy júzege asyrý bárimizge ortaq mindet dep tarqasty.
Arman OKTIаBR, «Egemen Qazaqstan»