Búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev elimizdiń Ishki ister mınıstrligine barlyq saýda ortalyqtarynda órt qaýipsizdigin tekserýdi tapsyrdy, dep habarlaıdy QazAqparat.
«Nazar aýdaratyn taǵy bir másele, Reseıdiń Kemerovo qalasynda oryn alǵan qaıǵyly jaǵdaı barlyqtaryńyzǵa málim. Saýda ortalyǵynda órt bolyp, kóp adam qaza tapty, 60-tan asa. Onyń 35-i balalar. Elbasy resmı túrde Reseı prezıdentine kóńil aıtty. Biz de bul tótenshe oqıǵadan sabaq alýymyz qajet», - dep atap ótti Úkimet basshysy.
Onyń dereginshe, qazirdiń ózinde bul másele áleýmettik jelilerde qyzý talqylanyp jatyr. Blogerler óz bastamalarymen saýda ortalyqtaryna baryp, evakýasııaǵa arnalǵan esikterdiń jabyq-ashyqtyǵyn tekserýde.
«Sol sebepten Ishki ister mınıstrligi men órtke qarsy qyzmetter ákimdiktermen birlesip, saýda ortalyqtarynda tekserý ótkizip, tıisti sharalar qoldanýy qajet. Asqar Uzaqbaıuly, (QR Premer-Mınıstriniń birinshi orynbasary Mamın) sizdiń baqylaýyńyzda», - dedi Baqytjan Saǵyntaev.