Ońtústik Qazaqstan men Qyzylorda oblystarynda jańbyr jaýyp, ózender arnalarynan asýy múmkin. Bul týraly Úkimettiń selektorlyq rejimdegi otyrysyn ashqan Premer-Mınıstr Baqytjan Saǵyntaev aıtty, dep habarlaıdy QazAqparat.
«О́zderińiz kórip otyrǵandaı, aýa raıy óte qubylmaly bolyp otyr. Tek sońǵy aptanyń ózinde Astana qalasynda, Aqmola, Pavlodar, Aqtóbe, Qostanaı jáne basqa da oblystarda kún raıy kúrt buzylyp, birneshe ret aldyn ala eskertý jarııalandy. Málimetter boıynsha aldaǵy kúnderi Ońtústik Qazaqstan men Qyzylorda oblystarynda da jańbyr jaýyp, ózender arnasynan asýy múmkin. Shyǵys Qazaqstan oblysynda da jaýyn-shashyn bolatyny kútilýde. Búgingi kúni shyǵysta jańbyr jáne taýdan aqqan sý eldi mekenderdi basyp qaldy», - dedi Úkimet basshysy.
Osy rette Baqytjan Saǵyntaev óńirdegi jaǵdaı boıynsha jáne qabyldanǵan sharalar týraly Shyǵys Qazaqstan oblysynyń ákimi Danıal Ahmetovke sóz berdi.
Ahmetovtiń aıtýynsha, shyǵysta bıyl túsken jaýyn-shashyn kólemi tómen bolǵanymen, jer tońy ótken jylmen salystyrǵanda 2 ese qalyń bolyp otyr. Buǵan qosa, ózenderde qatqan muzdyń qalyńdyǵy keı jerlerden 1 metrden asyp jyǵylǵan.
«Naýryzdyń 1-inen 25-ine deıingi aralyqta jaýǵan jańbyr qalypty normadan 3 ese artyq boldy. Búgingi kúngi jaǵdaı boıynsha oblysta úılerdi sý basýdyń 481 faktisi tirkeldi. Qazirgi kezde 175 úıde áli sý bar. 628 úı men 110 saıajaıdyń aýlasyna sý kirdi. Osyǵan oraı joǵary deńgeıli daıyndyq rejimi О́skemen jáne Semeı qalasynda, Jarma, Zyrıan, Kúrshim, Qatonqaraǵaı, Ulan aýdandarynda engizildi. Oblystyń úsh aýdanynda Aıagóz, Glýbokoe, Shemonaıhada tabıǵı sıpattaǵy tótenshe jaǵdaı jarııalandy», - dedi oblys basshysy.