Qostanaı áýejaıynda sportshylar, jankúıerler, oblys basshylary Phenchhanda ótken paralımpıada chempıony, jerlesimiz Aleksandr Kolıadındi saltanatpen kútip aldy.
Áýejaı ishinde ıne shanshar oryn joq. Astanadan kelip qonǵan ushaqtan túsken chempıondy jerlesteri «Biz senimen maqtanamyz, Aleksandr! Alǵa, Qazaqstan!» dep jazylǵan plakattarmen, kóńildi dýmanmen, mýzykamen qarsy aldy.
«Qysqy paralımpıadada Táýelsiz Qazaqstanda tuńǵysh altyn medaldi bizdiń jerlesimiz Aleksandr Kolıadın alyp keldi. Bul biz úshin úlken maqtanysh», dedi chempıondy qarsy alǵan oblys ákiminiń orynbasary Marat Júndibaev.
«Bul meniń qatysqan ekinshi olımpıadam. Sondyqtan men jarys barysynda eshqandaı tolqyǵan da, ýaıymdaǵanda joqpyn. Men jarysta ozý úshin barymdy saldym ári ózime senimdi de boldym», dedi Aleksandr Anatolevıch jýrnalısterdiń suraqtaryna.
Ústine oıýly qazaqy shapan, basyna bórik kıgen Aleksandr Kolıadın qarapaıymdylyǵymen jankúıerlerin baýrady.
«Árıne, jarysta ozý ońaı bolǵan joq. Kóp eńbektiń, jattyqtyrýshylarymnyń arqasy dep bilemin. Halyqtyń qurmeti, árıne, jaqsy, tolqyp kettim», dedi ol aqjarylyp. Chempıonnan qoltańba alǵysy kelgen, onymen selfı jasaǵysy kelgen balalar, jas sportshylar ony qorshap, birazǵa deıin bosatpaı qoıdy.
Áýejaıdan chempıondy kútip alýǵa Sarykól aýdanynan onyń jerlesteri men anasy Lıýbov Nıkolaevna da keldi.
«Phenchhandaǵy jarystyń barlyǵyn kórip otyrdym. Sasha birinshi bolyp kelgende qýanyshtan jyladym da, aıqaıladym da, sekirdim de, bári boldy. Ulym óte qarapaıym, minezi uıań, kóp sóılemeıdi. Biraq eńbekqor, eńbek bolmasa mynandaı bıikti baǵyndyra almaıdy ǵoı», deıdi Lıýbov Nıkolaevna.
Búgin keshke Qostanaı qalasyndaǵy «Mıras» mádenıet úıinde Aleksandr Kolıadınge qurmet kórsetiletin bolady.
Názıra JÁRIMBET, «Egemen Qazaqstan»
Qostanaı