Parlament Senatynyń Qarjy jáne bıýdjet jáne Ekonomıkalyq saıasat, ınnovasııalyq damý jáne kásipkerlik komıtetteri «Astana» halyqaralyq qarjy ortalyǵynda kóshpeli otyrys ótkizdi, dep habarlady Qazaqstan Respýblıkasy Parlamenti Senatynyń Baspasóz qyzmeti.
Senattyń Qarjy jáne bıýdjet komıtetiniń tóraǵasy Olga Perepechına qarjy salasyn «qaıta jańǵyrtý» Memleket basshysynyń bıylǵy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyndaǵy mindetterdiń biri ekenin eske saldy. Senator atap ótkendeı, ekonomıkany ınnovasııalyq damytýda, azamattardyń ál-aýqatyn arttyrýda jáne Qazaqstandy álemdegi eń damyǵan 30 eldiń qataryna engizý jolyndaǵy aýqymdy isterde «Astana» halyqaralyq qarjy ortalyǵyna erekshe ról júktelip otyr.
«Astana» halyqaralyq qarjy ortalyǵynyń basqarýshysy Qaırat Kelimbetov depýtattar aldynda sóz sóılep, «Astana» halyqaralyq qarjy ortalyǵy: qalyptasý jáne keleshegi» degen taqyrypta tanystyrylym ótkizdi. Sharaǵa qatysýshylar otandyq qor naryǵyn odan ári damytý, ıslam qarjylandyrýy, jeke adamdar men memlekettik qor aktıvterine halyqaralyq basqarýdy engizý, sondaı-aq qarjy tehnologııalary men qarjy ónimderin jetildirý sekildi ortalyqtyń strategııalyq baǵyttary týraly habardar etildi.
Depýtattar A. Beısenbaev, S. Eńsegenov, G. Dúısembaev, M. Kóbenov, D.Ádilbekov, E. Muqaev jáne B. Shelpekov «Astana» halyqaralyq qarjy ortalyǵynyń basshylyǵyna ortalyqtyń jumysy, onyń qyzmetin quqyqtyq jáne uıymdastyrýdaǵy negizgi máselelerge qatysty birqatar saýaldar qoıdy.
Otyrysty qorytyndylaı kelip, Senattyń Qarjy jáne bıýdjet komıtetiniń tóraǵasy Olga Perepechına bizdiń elimizge qarjy tehnologııasy men ınnovasııalary jáne ınvestısııa tartýda «Astana» halyqaralyq qarjy ortalyǵy aýqymdy múmkindikterdi tıimdi paıdalanyp, Qazaqstannyń qarjy ınfraqurylymynyń ortalyǵy atanatynyna, keleshekte TMD men shetel úshin qarjy toraby bolatynyna senim bildirdi.
«Astana» halyqaralyq qarjy ortalyǵy qyzmetin talqylaý jáne otyrys barysynda aıtylǵan aqparattar Senattyń zań shyǵarý qyzmetinde paıdalanylatyn bolady.