Birneshe kún buryn Koreı Halyq Demokratııalyq Respýblıkasynyń (KHDR) kósemi Kım Chen Yn kórshiles Qytaı elinde beıresmı saparmen bolyp, QHR tóraǵasy Sı Szınpınmen kezdesti. Bul Soltústik Koreıa basshysynyń bılikke kelgennen bergi alǵashqy sapary bolyp otyr. Bir qyzyǵy, Qytaı tarapy Soltústik Koreıa ókilderi óz eline qaıtqansha bul aqparatty qupııa ustady.
Qytaıdyń CCTV arnasy Kım Chen Ynnyń QHR-da 25-28 naýryz aralyǵynda bolǵanyn habarlady.Soltústik Koreıa basshysynyń Qytaıǵa saparlaýynyń mánisi nede? Álemdik sarapshylar bul týraly túrli boljamdar aıtýda. «Bul sapar Kım Chen Ynnyń aldaǵy eki aıǵa josparlanǵan mańyzdy eki kezdesýlerine qatysty» desedi boljaýshylar. Aıta ketý kerek, osyǵan deıin jabyq saıasat ustanǵan KHDR basshysy sáýir aıynda Ońtústik Koreıa prezıdenti Mý Chje Inmen kezdesýdi josparlap otyr. Sonymen qatar mamyrda AQSh prezıdenti Donald Tramppen kelissóz ótkizý nıeti bar.
«Sı Szınpın Donald Tramppen kezdesken. Onymen qalaı sóılesý kerektigin biledi. Degenmen Qytaı basshysy Kımniń neni qalaıtynyn, qandaı maqsaty baryn anyqtap alýy qajet. Búginge deıingi alaýyzdyqqa qaramastan Qytaı áli kúnge deıin KHDR-ǵa yqpalyn júrgizedi», deıdi amerıkalyq dıplomattar.
Aıta keterlik bir jaıt, KHDR kóseminiń Beıjińge brondy poıyzben barǵany qyzyǵýshylyq týdyryp otyr. Dál osy poıyzben 2011 jyly onyń ákesi Kım Chen Ir da Qytaıǵa jol salǵan. Budan bólek, Japonııanyń Nippon News Network arnasy vokzal aımaǵynda qaýipsizdik sharalary kúsheıtilgenin, al Tıananmen alańynda týrısterdiń júrýine tyıym salynǵanyn jetkizdi.
Qytaı men KHDR-dyń baılanysy aldaǵy ýaqytta da órbıtin syńaıly. Sebebi Sı Szınpın Dıaoıýtaıdaǵy rezıdensııada ótken kezdesýde Kım Chen Yn men onyń jubaıy Lı Sol Chjýdy Qytaıǵa taǵy kelýge shaqyrdy.
Al Kım Chen Yn óz sózinde Qytaı tóraǵasy Sı Szınpınmen ótken alǵashqy kezdesýi eki eldiń dostyq baılanystaryn nyǵaıtyp, Koreı túbegindegi beıbitshilik pen turaqtylyqqa yqpal etetinine senimdilik bildirdi.
О́tken jyly Soltústik Koreıanyń ballıstıkalyq zymyrandardy birneshe ret synaqtan ótkizgenin búkil álem synǵa alǵan. Osyǵan qatysty bul elge túrli sanksııa da salyndy. Al Kım Chen Yn bastaǵan birneshe laýazymdy top qara tizimge engizildi.
Osyǵan oraı, Seýl men Tokıo Beıjińnen KHDR kóseminiń sapary týraly túsinikteme surap otyr. Osyǵan qatysty jaqyn kúnderi Qytaı úkimetiniń ókili Iаn Szechı Seýlge barmaqshy.
Jahanǵa joıqyn qarýymen ses kórsetip otyrǵan Soltústik Koreıanyń bıyldan bastap álemge esik asha bastaǵany qýantarlyq jaıt. Al jaqyn kúnderi Sı Szınpın men Kım Chen Ynnyń kezdesýinde naqty qandaı máseleler talqylanǵany belgili bolýy múmkin.
Aıan ÁBDÝÁLI,
«Egemen Qazaqstan»