«Ámire» fılmi kórermenge jol tartty

Mádenıet jáne sport mınıstrliginiń qoldaýymen ekranǵa jol tartqan fılmde qazaqtyń tenor daýysty birtýar ánshisi Ámire Qashaýbaevtyń erte úzilgen án-ǵumyrynyń jarqyn da shýaqty hám shytyrmanǵa toly qaıshylyqty ómiri qatar sýretteledi. Atalmysh kınokartına ánshiniń 130 jyldyq mereıtoıyna oraı kórermenimen qaýyshyp otyr.

Jańa fılmniń tusaýkeserine oraı ótkizilgen baspasóz más­lıha­tynda Mádenıet jáne sport mınıstri Arystanbek Muha­me­dıuly: «Biz búgin nazar­laryńyzǵa elimizdiń dara ánshi­si Ámire Qashaýbaev týraly túsi­rilgen kórkem fılmdi usy­nyp otyrmyz. Fılmde Qashaý­baev­­tyń 1925 jyly Parıjdegi qaı­talanbas sapary týraly sóz etiledi. Sondaı-aq ánshi týra­ly elge belgisiz derekter de fılm­de kórinis tapqan. Ámire – bi­rinshi bolyp Eýropada qazaq ánin áýeletken ánshi. Onyń tulǵa­sy qazaq óneri men jalpy qazaq úshin asa mańyzdy» – dep kınotýyndynyń mańyzy men artyq­shylyǵyn atap ótti.

Fılmniń ereksheligi sol – qa­zaq­­tyń birtýar per­zenti, kómeıine bulbul uıa sal­ǵan kúmis kó­­meı ánshisine amerı­kalyq kı­no­ ma­man­darynyń qyzy­ǵý­shylyq tanytýy boldy. Sse­narııi­nen bastap, akterlik, rejıs­­serlik jumysyna deıin halyq­­aralyq mamandardyń teń dáre­jede atsalysýymen týǵan kıno­týyndynyń usynylý formasy men jetkizilý tásili, tarıhı derek­terdiń sóıletilýi ózgeshe. Ssenarıı avtory – Bend­jamın A. Van der Vın. Halyq­aralyq túsiri­lim tobynyń qura­mynda: amerı­kalyq-rejısser Djef Vespa, operator – Mak­sım Osadchıı syn­dy bilikti mamandar bar. Fılm Latvııa, Los-Andjeles qala­larynda, son­daı-aq Almaty obly­synyń Úsh­qońyr aýylynda túsirildi. Bas­ty rólderdi otandyq akterler: Sanjar Mádıev (Ámire) jáne Er­kebulan Daıyrov (Mus­tafa Shoqaı) somdady. Sony­men qatar fılm kórermenderi brı­tan­dyq akter Ben Aldrıdj ben aýstralııalyq aktrısa Eb­bı Kornıshtyń da tamasha jumy­syna kýá bola alady. Kıno­týyndyda Ámire Qashaýbaevtyń repertýaryndaǵy «Balqadısha», «Úsh dos», «Dýdar-aı», «Bes qa­ra­ger» jáne taǵy basqa ánder oryn­daldy. 

Án atasy – Ámire Qashaý­baev­tyń 130 jyldyq mereıtoıy­na tus­pa-tus kelgen fılm jal­py­­ulttyq kórsetilimge 2018 jyl­dyń 5 sáýirinen bastap shyǵady dep josparlanýda.

Nazerke JUMABAI, «Egemen Qazaqstan»