Ortalyq kommýnıkasııalar qyzmetinde Investısııalar jáne damý mınıstri Jeńis Qasymbek Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýy aıasynda ónerkásip, kólik jáne logıstıkalyq ınfraqurylymdy sıfrlandyrý, qurylys pen kommýnaldyq sektorǵa zamanaýı tehnologııalardy engizý, turǵyn úıge qoljetimdilikti qamtamasyz etý men jergilikti joldar jelisin damytý boıynsha júrip jatqan jumystarǵa baılanysty baspasóz máslıhatyn ótkizdi.
J.Qasymbektiń aıtýynsha, baǵdarlamany oıdaǵydaı iske asyrýdyń nátıjesinde 2017 jyly óńdeý ónerkásibiniń ósimi 5,1 paıyzǵa jetken. «Indýstrııalandyrý kartasy aıasynda 2017 jyly 1,5 trln teńge qarjyǵa 120 joba iske qosylyp, 10 myń turaqty jumys orny ashyldy. Bıyl jyl sońyna deıin 1 trln teńge qarjyǵa 150 jańa jobany iske qosý josparlanyp otyr. Onda shamamen 15 myń turaqty jumys orny ashylady», dedi J.Qasymbek.
Elimizdiń kóptegen azamattary úshin turǵyn úı ózekti másele retinde kún tártibinen túspeıdi. Mınıstrdiń sózinshe, byltyr «Nurly jer» baǵdarlamasyn iske asyrýdyń nátıjesinde 100 myńnan astam otbasy jańa baspanaǵa qol jetkizgen. 2017 jyldyń qorytyndysy boıynsha Qazaqstanda paıdalanýǵa berilgen turǵyn úı kólemi 11 mln sharshy metrden asqan. Ol 2016 jylǵa qaraǵanda 6,2 paıyzǵa joǵary.
«Memleket basshysy bıylǵy Joldaýynda 2030 jyly halyqty jan basyna shaqqanda 30 sharshy metrden keletindeı turǵyn úımen qamtamasyz etýdi tapsyrdy. Sondyqtan «Nurly jer» baǵdarlamasyn odan ári iske asyrý mehanızmderin qaıta qarap jatyrmyz. Turǵyn úıge qoljetimdilikti qamtamasyz etý maqsatynda arzan qurylys pen ıpotekalyq kredıt berý máseleleri boıynsha jumys júrgizemiz. 2030 jylǵa qaraı turǵyn úı kórsetkishin bir turǵynǵa shaqqanda 30 sharshy metrge deıin jetkizý josparlanýda. Sondaı-aq Memleket basshysy jarııalaǵan bes áleýmettik bastamany iske asyrý aıasynda osy aıda jańa «7 – 20 – 25» ıpotekalyq baǵdarlamasynyń normalaryn esepke ala otyryp, «Nurly jer» baǵdarlamasyna engiziletin ózgeristerdi Úkimetke tanystyramyz. Qysqasha aıtqanda, jańa baǵdarlamada nesıeniń paıyzdyq ústemesi jylyna 7 paıyzǵa deıin tómendetiledi. Al bastapqy jarna 20 paıyzdan aspaıdy. Aı saıynǵy tólem júktemesin azaıtý úshin nesıe merzimi 25 jylǵa deıin uzartylady. Osy mehanızm arqyly árbir jumys isteıtin adam nesıege páter satyp ala alady», dedi ol.
Sonymen qatar Investısııalar jáne damý mınıstri aýyldyq eldi mekenderdi ortalyqtandyrylǵan aýyzsýmen jabdyqtaýdy 59 paıyzǵa, al qalalarda 94 paıyzǵa jetkizý josparlanyp jatqanyn jetkizdi.
Memleket basshysy Joldaýynda kólik-logıstıka ınfraqurylymynyń tıimdiligin arttyrý máselesine erekshe nazar aýdarǵany belgili.
«Sondyqtan «Nurly jol» ınfraqurylymdy damytý memlekettik baǵdarlamasy aıryqsha baqylaýda. О́tken jyly birneshe iri joba júzege asty. Olardyń ishinde Almaty-Shý ýchaskesindegi ekinshi joldyń qurylysy, Quryq portynda avtomobıl-paromdyq kesheniniń birinshi kezeńi aıaqtaldy. Astana qalasynyń «Nursultan Nazarbaev» atyndaǵy áýejaıynda jańa jolaýshylar termınaly, «Nurly jol» jańa temir jol vokzaly paıdalanýǵa berildi. Respýblıkalyq mańyzdaǵy 4,4 myń shaqyrym avtojolǵa qurylys jumystary júrgizildi. О́ńirishilik mobıldilikti arttyrý maqsatynda Memleket basshysy jergilikti jol jelisin jóndep, qaıta jańartý úshin qarjylandyrý kólemin ulǵaıtýdy tapsyrdy. Bıyl qarjylandyrý kólemi 85 mlrd teńgeni qurady. 2018 jylǵy bıýdjetti naqtylaý kezinde mınıstrlik qosymsha 30 mlrd teńge bóldi. Oblys ákimdikteri de jergilikti bıýdjetten qarjy qarastyrdy. Aldaǵy jyldary qarjylandyrý somasy 150 mlrd teńgege deıin jetkiziledi. Ol qarjyǵa jyl saıyn shamamen 5 myń shaqyrym jol jóndeledi. Bıyl «Nurly jol» baǵdarlamasyn júzege asyrý aıasynda 4,2 myń shaqyrym respýblıkalyq mańyzy bar avtojoldar jáne 3 myń shaqyrym jergilikti jeliler rekonstrýksııalanady. Qabyldanǵan sharalar aldaǵy jeti jylda jergilikti joldardyń 85 paıyzyn jaqsartýǵa múmkindik beredi. Biz avtojoldardy salýǵa bólingen qarajattyń tıimdiligi men ashyqtyǵyn baqylaýdy kúsheıtemiz. Memleket basshysynyń Joldaýynda júktelgen barlyq tapsyrma aıryqsha baqylaýda bolady jáne der kezinde oryndalady», dedi J.Qasymbek.
Raýan QAIDAR,
«Egemen Qazaqstan»