Ázerbaıjannyń qazirgi prezıdenti Ilham Álıev, onyń jubaıy Mehrıban Álıeva jáne otbasy músheleri óz tańdaýyn jasady.
Memleket basshysy Baký qalasyndaǵy Sabaıl saılaý okrýginiń №6 saılaý ýchaskesine kelip daýys bergen.
Kezekten tys ótkizilip otyrǵan saılaýǵa 8 kandıdat qatysyp jatyr. Memleket basshysy Ilham Álıevten bólek, Sosıal-demokratııalyq partııasynyń ókili Araz Alızade, Birtutas halyq maıdany partııasynan Gýdrat Gasangýlıev prezıdenttik dodaǵa tústi. «Ulttyq maıdan toptarynyń ókili Razı Nýrýllaev jáne Ulttyq órleý qozǵalysy» partııasynan usynylǵan Farad Gýlıev te el basqarýdan úmitti. Sonymen qatar, «Jańa Mýsavat» partııasynan Hafız Gýdjıev pen ózin-ózi usynýshy Zahıda Orýdja da kandıdattar qatarynda.
Eldegi mańyzdy oqıǵany baqylaýǵa álemniń túkpir-túkpirinen 900-ge jýyq baqylaýshy keldi.
Aıta keterligi, prezıdenttik saılaýdy 894 halyqaralyq jáne 58 175 jergilikti baqylaýshy qadaǵalap otyr. Ortalyq saılaý komıssıasy bes ret, 10:00, 12:00, 15:00, 17:00 jáne 19:00-de sharanyń qalaı ótip jatqany týraly málimet taratady. Tańerteń 08:00-de bastalǵan saılaý keshki 19:00-de aıaqtalady.
Abaı ASANKELDIULY,
«Egemen Qazaqstan»
BAKÝ