Byltyr Qazaqstanda 600 adamdy eki azamattyǵy úshin jazalady, dep málimdedi Parlament Májilisiniń depýtaty Nurlan Ábdirov.
«Eki azamattyq isi mańyzdy problemalardyń biri bolyp otyr. IIM málimeti boıynsha, 2017 jyly eki azamattyǵy úshin shamamen 600 adam jazalandy. Qazaqstandyqtardyń ózge eldiń azamattyǵyn alý máselesi boıynsha sheteldik dıplomatııalyq ókildiktermen turaqty baılanys kerek», - dedi N.Ábdirov Májilistegi Úkimet saǵatynda.
Onyń aıtýynsha, Konstıtýsııa boıynsha Qazaqstan azamaty oǵan qosa basqa eldiń azamaty bola almaıdy.
«Alaıda bizdiń eldiń azamattyǵyn joımaı turyp, basqa eldiń azamattyǵyn alatyn azamattar da bar. Qazaqstan azamattyǵyn almastan buryn shetel azamattyǵynan shyqqandyǵyn rastaıtyn qujattardy usyný týraly talaptar bekitý máselesin pysyqtaý kerek, onyń ishinde ony alýdyń jeńildetilgen tártibinde de. Aıta keter bolsaq, 2017 jyly jeńildetilgen tártipte bizdiń eldiń azamattyǵyn 30 myńnan astam adam alǵan», - dep málimdedi ol.