Bıyl kórnekti ǵalym, akademık Kúlásh Qunantaıqyzynyń týǵanyna 95 jyl tolyp otyr. Osyǵan oraı ardaqty tulǵanyń týǵan jeri – Shyǵys Qazaqstan oblysy Ulan aýdanynyń Bozanbaı orta mektebinde ǵylymı-praktıkalyq konfensııa ótti.
Kúlásh Qunantaıqyzy – qazaq áıelderiniń arasynan shyqqan alǵashqy pedagogıka ǵylymdarynyń doktory. Ulttyq ǵylym akademııasynyń akademıgi. Birqatar laýazymdy qyzmet atqarǵan. Qazaq KSR Joǵary jáne orta bilim mınıstriniń orynbasary boldy. Ásirese Qunantaıqyzynyń basqarý qabileti men uıymdastyrýshylyq sheberligi Qazaq qyzdar pedagogıkalyq ınstıtýynyń rektory bolǵan jyldary jarqyrap kórindi. Elimizdegi biregeı bilim ordasynyń materıaldyq-tehnıkalyq bazasyn nyǵaıtýǵa kúsh saldy. Onyń basshylyǵymen jańa oqý korpýsy boı kóterip, stýdentter jataqhanasy salyndy. Instıtýt qyzmetkerlerine kóppáterli úı turǵyzyldy. Qysqasy, qazaq qyzdarynyń alańsyz bilim alýyna tolyq jaǵdaı jasady. Bir jaǵynan, ǵalym basshylyq qyzmette júrip, ǵylymnan da qol úzbedi. Qanshama shákirt tárbıeledi. Ol kisiniń jetekshiligimen 4 ǵylym doktory men 20-dan astam ǵylym kandıdaty daıarlandy.
Atalǵan ǵylymı konferensııada aıtýly akademıktiń ǵylymı-pedagogıkalyq murasymen birge zamanaýı bilim júıesinde tıimdi oqytý ádisterin qoldanýǵa baǵyt berý máseleleri qozǵaldy. Sondaı-aq ǵylym qaıratkeriniń pedagogıkalyq ıdeıalary men ǵylymı tujyrymdarynyń búgingi bilim salasyndaǵy mańyzyna da mán berildi.
Konferensııaǵa elimizdegi jetekshi joǵary oqý oryndarynyń ǵalymdary onlaın qatysty. Aıtalyq, Abaı atyndaǵy Qazaq ulttyq pedagogıkalyq ýnıversıtetiniń professory Ámına Ámirova, Qazaq ulttyq qyzdar pedagogıkalyq ýnıversıtetiniń professory Márııash Muqasheva, L.N.Gýmılev atyndaǵy Eýrazııa ulttyq ýnıversıtetiniń professory Perızat Seıitqazy akademıktiń ǵylymı eńbekteri men pedagogıka ǵylymyndaǵy orny týraly mazmundy baıandama jasady. Onda ǵalymnyń zertteýleri qazaq pedagogıkasynyń damýy-na tyń serpin bergeni atap ótildi. Ásirese akademık Kúlásh Qunantaıqyzynyń mektep uıymdarynyń qalyptasýy men tárbıe júıesiniń evolıýsııasy jónindegi eńbekteri búginge deıin qundy derekkóz ekeni aıtyldy. Jıyn aıasynda «cross-training» alańy uıymdastyryldy. Munda pán muǵalimderi zamanaýı oqytý ádisteri men sıfrlyq tehnologııalardy bilim úderisine engizý jáne oqýshylardyń shyǵarmashylyq qabiletin damytý joldary jaıynda pikir almasty. Bul alańda ustazdar birlesken jobalaryn usynyp, ınnovasııalyq pedagogıkalyq tásilderdi talqylady.
Kúlásh Qunantaıqyzynyń mereıtoıyna arnalǵan is-sharalar legi Ulan aýdanynyń ózge bilim ordalarynda da jalǵasty. Máselen, Sársen Amanjolov atyndaǵy orta mektepte «Ulan – ǵalymdar túletken kıeli meken» atty ardager ustazdarmen kezdesý ótti. Oǵan ǵalymnyń nemere inisi Oral Qunafın qatysyp, biregeı tulǵanyń adamı bolmysy men qaıratkerligi jaıynda áńgimeledi.
Sonymen birge mazmundy keshke jerlesimiz, Astana halyqaralyq ýnıversıtetiniń rektory Anar Myrzaǵalıeva, pedagogıka ǵylymdarynyń kandıdaty, professor Nurjamal Smanova, ǵalymnyń jıeni Sáýle Ybyraeva onlaın qatysyp, áserli estelikterimen bólisti. Akademık týraly arnaıy kórme uıymdastyrylyp, oǵan ulaǵatty ustazǵa qatysty qujattar men fotosýretter qoıyldy.
Álııa ÁBIShEVA,
Ulan aýdandyq bilim bóliminiń ádiskeri
Shyǵys Qazaqstan oblysy