Osyndaı taqyryppen sol kezdegi Qazaqstan Respýblıkasynyń Syrtqy ister mınıstri Qasymjomart Toqaevpen gazet tilshisi Meırambek Tólepbergenniń suhbaty berilgen.
Tilshiniń táýelsizdiktiń bes jylynda Qazaqstannyń syrtqy saıasatynyń qalyptasý prosesin qalaı baǵalaıtyndyǵy jónindegi suraǵyna Syrtqy ister mınıstri: «Bizdiń syrtqy saıasat taqyrybynda áńgimemiz Prezıdent Nursultan Nazarbaev elimizden alysta, Úndistan men Avstralııada sapar shegip júrgen kezde ótip otyr. Maǵan bul aıryqsha nyshan sekildi seziledi. Bir jaǵynan alyp qaraǵanda bul jaǵdaı bizdiń syrtqy baılanysymyzdyń keńeıe, Qazaqstannyń syrtqy saıasatynyń údeı túskenin, bizdiń dúnıejúzilik arenadaǵy qadamdarymyzdyń salmaqty ekendigin kórsetedi... Búgingi kúnderi Qazaqstan jalpy dúnıejúzilik, sondaı-aq aımaqtyq isterge de tikeleı tartylyp otyr. Elimizdiń qaýipsizdigi máseleleri prınsıpti jaǵdaıda sheshildi. Bizdiń syrtqy saıasatymyzdyń basty baǵyttary aıqyndaldy. Shetelderde dıplomatııalyq ınfraqurylym jasaldy. Qazaqstandaǵy qaıta qurýlar úshin syrtqy qolaıly jaǵdaılar qamtamasyz etildi. Bul degenimiz – ótken bes jyldyń basty qorytyndylary bolyp tabylady. N.Á.Nazarbaevtyń óz mańyzdylyǵy jaǵynan tarıhı mindetti oryndaǵany týraly ashyq aıtýymyz kerek» dep jaýap beripti.
Sondaı-aq Qasymjomart Toqaev sol ýaqytta Qazaqstandy álemniń 117 memleketi tanyǵandyǵyn, olardyń 106-sy men dıplomatııalyq qatynastar ornatylǵandyǵyn, álemniń 28 elinde Qazaqstannyń elshilikteri ashylǵandyǵyn, qosa mindet atqarý praktıkasy boıynsha 40-tan astam elde ókildikterimiz jumys istep jatqandyǵyn, Almatyda 60-qa jýyq shetel elshilikteri men halyqaralyq uıymdardyń mıssııasy jumys isteıtindigin, bul kórsetkish boıynsha Qazaqstan TMD elderiniń ishinde Reseı men Ýkraınadan keıingi úshinshi orynda turǵandyǵyn atap kórsetken.
Mınıstr kóptegen eldermen, óńirlermen, halyqaralyq uıymdarmen Qazaqstan ornyqty qarym-qatynas ornata alǵandyǵyn, aldaǵy ýaqytta osy prosesti údete berý qajettigin aıtyp, syrtqy saıasattyń negizgi baǵyttaryna toqtalypty. TMD memleketterine qatysty saıasatymyz kelesi jyldary edáýir belsendi júrgiziletindigin, Qazaqstannyń tuńǵysh ǵalamdyq syrtqy saıası problemany sheshýi – Semeı polıgonyn jabýy AQSh-pen, basqa da ıadrolyq derjavalarmen qarym-qatynasyn jaqsartýǵa negiz qalaǵandyǵyn, osy jaǵdaı Batys elderimen qarym-qatynasyn nyǵaıtýǵa múmkindik beretindigin aıtqan.