Bul týraly ortalyq kommýnıkasııalar qyzmetindegi brıfıng barysynda Atyraý oblysynyń ákimi Nurlan Noǵaev málim etti. Bul jobaǵa Atyraý oblysynyń bıznes qurylymdarynyń ókilderi qoldaý bildirdi. Tanymal qazaq kompozıtorynyń eskertkishin ornatýǵa 15 mln teńge jumsalatyn bolady.
Músindik kompozısııa Qazaqstan Respýblıkasy Táýelsizdiginiń 20 jyldyǵyn Túrkııada merekeleý aıasynda 2011 jyly Ankarada ashylǵan Dına Nurpeıisova atyndaǵy saıabaqta ornatylady. Sol jyly Túrkııada ataqty qazaq kompozıtory Dına Nurpeıisovanyń 150 jyldyq mereıtoıy keńinen atap ótilgen bolatyn. - Qazaqstannyń Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda rýhanı jáne mádenı qundylyqtardy saqtaýǵa jáne molaıtýǵa erekshe kóńil bólingenin atap ótkim keledi, - dedi Nurlan Noǵaev. - «Jahandaǵy zamanaýı qazaqstandyq mádenıet» jobasy aıasynda qazirgi tańda qazaq mádenıetiniń úzdik týyndylarymen álem jurtshylyǵyn tanystyrý úshin jaǵdaılar jasalýda. Bul otandyq shyǵarmashylyq zııaly qaýym úshin úlken múmkindikterge jol ashady. Qazaqstan Elshiliginiń, Túrkııanyń mádenıet jáne týrızm mınıstrliginiń, Túrik mádenıeti halyqaralyq uıymynyń (TIýRKSOI) jáne Ankara qalasy Etımesgýt aýdany meriniń uıymdastyrýymen 2011 jyly Dına Nurpeıisova atyndaǵy saıabaq ashylǵanyn esterińizge salamyz. Bul tanymal kúıshiniń atyndaǵy shetelde ashylǵan alǵashqy saıabaq. Ataqty qazaq kompozıtory Dına Nurpeıisova tek qazaq halqynyń emes, búkil túrik jurtshylyǵynyń yqylasy men qurmetine bólengen túrik álemindegi alǵashqy áıel bolyp tabylady.