Qaraǵandyda jappaı dıktant jazý sharasy 2016 jyldan beri uıymdastyrylyp keledi. Alǵashqy aksııa kezinde qatysýshylardyń úsheýi ǵana úzdik baǵa alǵan bolatyn. 2017 jylǵy synaqqa 403 adam qatysyp, olardyń ishinde 30-y joǵary upaıǵa ıe bolǵan.
Al bıyl Qaraǵandy jáne Shahtınsk qalalarynda ótken jappaı dıktant aksııasynda 796 adam baq synady. Nátıjesinde 32 qatysýshy úzdik kórsetkishke qol jetkizdi. Bul – respýblıka boıynsha eń joǵary nátıje. Úzdikterdi marapattaý saltanaty Qaraǵandyda 28 sáýir kúni ótedi.
Saýat jarysynda mátindi 29 adam oqydy. Olardyń qatarynda fılolog Sáýle Ybyraeva, «Vybıraı» jýrnalynyń redaktory Tatıana Golýbsova, psıholog Anna Korobeınıkova, fılolog Altynaı Ahmetova, stendap-komık Rýstam Abıldın, merekeler júrgizýshisi Pavel Gromov, fılolog Nadejda Andreeva, ánshi Álibek Salıkov, sýretshi Qaırat KEI-KEI, «ASKAR» kınofestıvaliniń birinshi laýreaty Alevtına Altýnına, dızaıner Irına Nechaeva, fılolog Nelıa Iýshko, QMMÝ qazaq tili kafedrasynyń meńgerýshisi Marına Maretbaeva, professor, medısına ǵylymdarynyń doktory Vılen Molotov-Lýchanskıı, radıo jáne teledıdar dıktory Vladımır Rıabsev, jýrnalıst jáne radıojúrgizýshi Anna Strokova boldy.
Sonymen qatar orys tilin shet tili retinde oqyp jatqandar úshin qurylǵan «TruD» testin 11 adam úzdik baǵaǵa tapsyrdy.
Saýattylyqty tekserý boıynsha halyqaralyq aksııanyń úılestirýshisi Laýra Ilııasova jappaı dıktantty sonymen birge aǵylshyn, qazaq tilderinde ótkizýdi usyndy. «Elimiz úsh tildilik saıasatyn ustanatyndyqtan óskeleń urpaq qazaq, orys jáne aǵylshyn tilderin bilýi qajet dep sanaımyn. Meniń oıymsha, kelesi jyly Bilim jáne ǵylym mınıstrliginiń kómegimen jáne Astana qalasynyń bilim basqarmasymen birige otyryp, biz jappaı dıktantty tek orys tilinde ǵana emes, sonymen qatar qazaq jáne aǵylshyn tilderinde ótkizemiz. Bul ıdeıa ásirese mektep oqýshylary men stýdentteri úshin qyzyqty bolady dep oılaımyn», dedi ol.
Qaırat ÁBILDA,
«Egemen Qazaqstan»
Qaraǵandy oblysy