Hokkeıden Qazaqstan ulttyq quramasy Vengrııa astanasy Býdapesht qalasynda ótip jatqan álem chempıonatynyń úshinshi matchynda Italııa quramasymen kezdesip 0:3 esebimen jeńildi.
Alǵashqy eki týrda jeńilistiń ne ekenin bilmeı kele jatqan Qazaqstan quramasyn úshinshi kezdesýde Italııa hokkeıshileri toqtatty. Bul – Italııa quramasynyń birinshiliktegi ekinshi jeńisi. Buǵan deıin ıtalııalyq hokkeıshiler birinshi týrda Polshany 3:1 esebimen jeńse, ekinshi matchta aıdyn ıeleri Vengrııa quramasynan 2:3 nátıjesimen jeńilgen-di. Jankúıerlerdiń esinde bolar, chempıonattyń alǵashqy matchynda otandastarymyz Italııany jeńgen Vengrııa quramasynan 3:0 esebimen basym túsken edi.
Endi Italııa – Qazaqstan oıynyna az-kem toqtalyp ótsek. Match bastala sala oıyn tizginin óz qoldaryna alǵan Italııa quramasynyń oıynshysy Peter Hokkofler 5-mınýtta esepti ashty. Arada tórt mınýt ótkende Dıego Kostner esepti eseleı tústi. Osydan soń Ǵalym Mámbetálıev shákirtteri esepti qysqartýǵa qansha tyrysqanymen, birinshi kezeńde Italııa qaqpasyna shaıba soǵa almady.
Ekinshi kezeńdi ıtalııalyqtar shabýylmen bastap, oıynnyń 25-mınýtynda óz degenderine jetti. Bul joly Shon Mak-Monagl mergendigimen kózge tústi. Otandastarymyz esepti teńestirýge qansha umtylǵanymen, Italııa quramasynyń oıynshylary qorǵanysta óte saýatty oınady. Osylaısha eki qurama arasyndaǵy match 3:0 esebimen ıtalııalyqtardyń paıdasyna sheshildi. Sóıtip Qazaqstan quramasy álem chempıonatynda birinshi ret jeńiliske ushyrady.
Matchtan soń eki quramanyń bas jattyqtyrýshylary baspasóz máslıhatyna qatysyp, oıyn týraly pikirlerin aıtty.
Ǵalym MÁMBETÁLIEV: «Menińshe, shákirtterim jyldam shaıba ótkizip alǵan soń ózderine kele almaı qaldy. Jigitter Ulybrıtanııaǵa qarsy ótken matchta qatty sharshap qaldy. Al biz oınaǵan kúni ıtalııalyqtar demalǵan bolatyn. Oıynǵa osy faktor qatty áser etti dep oılaımyn. Sondaı-aq olar bizge oınaýǵa múmkindik bermedi jáne ózderi jyldam gol soǵyp, oıyn taǵdyryn sheship ketti», dedi.
Kleıton BEDDOS: «Bul oıynda bizdiń jeńiske jetýimizdiń negizgi sebebi – komandalyq rýh jáne jeńiske degen umtylys. Degenmen Qazaqstan quramasy bizge qaraǵanda óte aqyldy oıyn kórsetti», dedi.
Qazaqstan quramasy búgin Slovenııamen kezdesedi.
Álı BITО́RE, «Egemen Qazaqstan»